4Ps beneficiaries sa Laak himoong pilot sa SLP ni P-Noy

Compostela Valley Province – Himoong Pilot kon maoy unang makabenepisyo sa Sustainable Livelihood Program ni Pangulong Benigno S. Aquino-III, ang mokabat 5,792 4Ps Beneficiaries sa Laak, ug matud sa mga dagkong opisyal sa DSWD nga ang 30% kon 1,738 kanila maoy tabangan sa gobyerno nga makahulam ug Capital alang sa ilang negosyo nga walay interest ilalom sa SEA-K kon Self Employment Assistance Kaunlaran Integrated Program.

Samtang, ang 20% kon 1,738 ka pamilya maoy tabangan sa gobyerno nga sila o ang miyembro sa ilang pamilya makatrabaho, ug ang 50% kon 2,896 kanila ipailalom sa libreng Skills Training aron dali ra makakita ug usa ka maayong trabaho.

Ang mga dagkong opisyal sa DSWD nagpahibalo sad nga miabot na karon sa 37,955 ka pamilyang Comvaleño ang nakabenepisyo sa 4Ps kon Pantawid Pamilyang Pilipino Program sa Pangulo, ug ang lungsod sa Laak maoy dunay labing daghan nga miabot na sa 5,792 ka pamilya.

Nakabenepisyo karon sa 4Ps ang 4,235 ka pamilya sa Pantukan, 2,850 ka pamilya sa New Bataan, 4,549 ka pamilya sa Compostela, 2,781 ka pamilya sa Montevista, 3,145  ka pamilya sa Maragusan, 2,187 ka pamilya sa Mabini, 3,333 ka pamilya sa Nabunturan, 3,702 ka pamilya sa Maco, 3,804 ka pamilya sa Monkayo, ug 1,943 ka pamilya sa Mawab.

Ilalom sa 4Ps ni PNoy, ang kada pamilya gitabangan sa gobyerno  pinaagi sa DSWD ug  cash assistance nga dili molapas sa P1,400.00 pesos matag bulan. Tag P300.00 pesos matag bulan maoy madawat sa kada bata, sa  tulo ka mga anak nga dunay edad ubos sa katorse anyos. Samtang ang P500.00 pesos maoy gigahin nga medical assistance alang sa mga mama. Apan kutob ra sa lima ka tuig ang 4Ps mao nga gisugdan sad pag-implementar ang SLP aron dili na sila mahibalik pa sa daang lisud nga kahimtang.

Matud usab sa DSWD, nga miabot gyod sa kapin  P50 milyones pesos ang cash assistance nga mahatag sa mga katawhang Comvaleño matag-quarter.Tungod niini gipasalamatan ug dako ni Gov. Uy ang DSWD labi na si DSWD Secretary Dinky Soliman tungod kay iyang gituman ang iyang saad sa probinsiya nga iya pa gyong dugangan ang ihap sa mamahimong 4Ps beneficiaries sa Compostela Valley.  (gilbert cabahug/ids comval)