DIGOS CITY, Davao del Sur, July 25 – Siyam ka munisipyo ang nakadawat og mga ekipong pang agrikultura nga mikabat ngadto sa kawhaan ang gidaghanon ining nag-unang unom ka bulan sa tuig 2012.
Kalakip sa mga resipienteng kalungsuran mao ang Sarangani alang sa Parish Project Coordinator; Sta. Cruz alang sa tulo ka Melilia Rice Growers; ug Matanao alang sa Barangay Local Government Unit (BLGU) sa Kibao, DepEd District 1 and DepEd District 2 ug Bulb Onion Farmers sa Asinan.
Sa lungsod sa Magsaysay, natunolan og ekipo ang DepEd Magsaysay North, DepEd Magsaysay South, DepEd NHS sa Bala ug Bulb Onion Farmers sa barangay sa Mabini ug San Miguel.
Gitunol usab sa Hagonoy ang lain pang knapsack sprayer sa BLGU Kibuaya, samtang sa Malalag, nakadawat ang Bolton Coconut Farmers MFC ug DepEd Malalag District.
Ang resipiente sa Sulop mao ang DepEd Sulop District; samtang sa Sta. Maria mao ang DepEd Sta. Maria West ug East Districts ug sa Malita mao ang DepEd Malita District.
Nagbalor og 100 mil pesos ang kawhaan ka knapsack sprayers sa tag singko mil pesos kada usa.
Giapod-apod usab ang tulo ka power tillers alang sa Padada, Digos City ug Hagonoy, ug lain pang power sprayer nga adunay usa ka plastic drum ngadto sa Kiblawan-Pasig Upland Farmers Cooperative, Bolton Coconut Farmers sa Malalag, Matanao, Padada ug Bansalan.
Nasayran ning tinubdan nga sa wala pa madawat ang mga knapsack sprayers, mihimo og paglagda ang siyam ka mga local government units tali sa Department of Agriculture Regional Field Unit XI kansang pondo ang gikuha sa High Value Commercial Crops Development Program.
Ang mga naasoy’ng sprayers magamit alang sa pagbubu sa mga tanaman o gulayon sama sa pechay, alugbati, ampalaya, talong ginamit ang tubig.
Mamahimo sab nga magamit kini nga adunay mga kemikal nga insecticide o fungicide sa mga tanom o gulay nataptan og mga sakit o peste sa pananom.
Ang mga knapsack sprayers na release niadtong Mayo 15, Hunyo 6, Hunyo 20, Hunyo 26, Hulyo 4 og Hulyo 4, 2012.
Kada tuig, aduna gayuy igahin nga pondo nga pagakutluon gikan sa High Value Commercial Crops Development Program sa superbisyon sa Department of Agriculture Regional Field Unit XI alang niining katikaran sa agrikultura paghatag pribilihiyo sa mga vegetable growers o high value commercial crops growers sa nagkadaiyang dapit o kalungsuran sa Davao del Sur.
Kini ang kanunay gitutukan sa mga personahe sa Office of the Provincial Agriculturist ilabi na sa pag apod-apod og mga ekipo sama sa knapsack sprayers, power tillers ug power sprayer with plastic drum ubos sa pagdumala ni Engineer Jovita Britaña.
Uban kanila mao ang pakig-alayon sa mga Municipal Agricultural Officers ug Coordinators nga nasangkap na sa kahibalo human sila mipailawom sa mga series of workshops. (PIO-DavSur/Nilda S. Aniñon)
No comments:
Post a Comment