Gov. Uy gitunol ang P806,100.00 nga cash assistance sa New Cebulan MPC

Kabahin sa nagapadayong pag-implementar sa probinsiya sa mas gipalapdan ug mas gipahugtang “20 Million 15 Trees” Program ni Gov. Arturo “Chiongkee” Uy sa Compostela Valley, nagpadayon gihapon ang paspas nga pagpang apod-apod sa probinsiya sa mga semilya sa mga kahoy ngadto sa mga katawhan. Apan mas dakong pundo ang gigahin sa gobernador alang sa mga kahoy nga giilang High Value Commercial Crops (HVCC) sama sa Cacao, Rubber, Kape, mga prutas, ug uban pa.

Bag-o lang gitunol sa gobernador ngadto sa New Cebulan Multi-Purpose Cooperative diha sa Brgy. New Cebulan, Montevista, ang tseke nga nagkantidad ug P806,100.00 pesos nga maoy ilang gamiton sa pagpamalit sa mga semilya ug sa mga agricultural inputs sa ilang Cacao Production ug Rubber Plantation Projects.

Gikan sa Department of Agriculture(D.A.) ang maong salapi ilalom sa ilang Davao Integrated Development Program(DIDP), ug kabahin sa maong Programa mao ang Upland Farming Model Village Project nga usa mga mahinungdanong agricultural interventions nga padayong giimplementar ni Gov. Uy  sa pipila na ka mga lungsod sa Compostela Valley.

Ang New Cebulan Multi-Purpose Cooperative maoy gipiling beneficiary sa DIDP-LGU Upland Farming Model Village Project (UFMVP) ug matud ni Manny Buladaco-DIDP-UFMVP Coordinator, nga loan component sa proyekto ang P415,500.00 alang sa ilang Cacao Production ug kini maoy pagabayaran sa Coop. Apan ang laing P390,000.00 pesos nga maoy ilang gamiton para sa ilang Rubber Plantation usa ka grant mao nga dili na sila pabayron niini sa gobyerno.

Pinaagi nila ni Executive Assistant Macario Humol ug SP Member Paul Galicia, malipayong gitunol ni Gov. Uy atol sa malampusong ceremonial turnover naidtong Hulyo 6,2012 ang duha ka mga tseke ngadto sa kooperatiba. Kini gidawat sa ilang Chairman of the Board nga si Mr. Roger B. Doyog nga mihatag sa iyang acceptance and commitment message.

Mitambong usab sa malampusong turnover ceremony sila si Mayor Teofista Jaoud, si PAGRO Chief Dr. Rolando Semene, si Brgy. Capt. Felipe G. Bermudez Jr., si SB Member Roberto Garcia, MAGRO and PAGRO Staff, Brgy. Officials, ug ang 38 ka mga miyembro sa New Cebulan Multi-Purpose Cooperative. (gilbert cabahug/ids comval)