Gawas nga sayon kaayo ang pagbuhi sa isdang Pangasius tungod nga kini pwedeng hatagan sa bisan unsang klase sa pagkaon, kusog kaayong motubo, ug disease-resistant, gipahibalo sad karon sa Department of Trade and Industry(DTI) Comval pinaagi ni DTI Provincial Program Director Atty. Lucky Siegfred Balleque ang dakong bintaha niining isdaa diha sa mercado tungod sa value-added products nga mahimo.
Si Atty. Balleque maoy usa sa mga lecturer sa Pangasius Business Opportunity Seminar diha sa Way Kurat Hall sa 1st District Congressional Building sa Compostela niadtong Hulyo 4,2012 nga libreng gitunol sa probinsiya pinaagi sa DTI-Comval, sa Provincial Agriculturist Office (PAGRO), ug sa BFAR-Provincial Fishery Office.
Ang value-added products sa isdang Pangasius matud ni Atty. Balleque maoy dugang bentaha niini sa ubang mga isda tungod kay mas modako pa ang kita sa producer kon magpapatigayon nga moapil sa production niining isdaa.
Apil sa value-added products nga mahimo gikan sa isdang pangasius matud ni Atty. Balleque mao ang bacon, buttered sausage, chicharon, chorizo, bulad, embotido, fishballs, hotdogs, lamayo, longaniza, kikiam, siomai, ug uban pa.
Ang pagpadaghan sa isdang Panggasius maoy usa sa mga labing mahinungdanong intervention nga gipatuman ni Gov. Uy sa probinsiya ilalom sa iyang Fish Sufficiency Program sa tumong nga sa moabot nga mga adlaw mamahimong abunda sa isda ang probinsiya ug mamenosan ang pagkadependent sa probinsiya sa supply nga isda gikan sa ubang mga lugar.
Sa pagkakaron matud ni Mr. Ronald Sibayan-Provincial Fishery Coordinator, nga hatchery sa isdang Pangasius ug sa uban pang klase sa mga isda ang Compostela Valley ug kini anaa nahimutang diha sa Brgy. Libasan, Nabunturan. Ang probinsiya padayong nanghatag sa semilyang isda sama sa Hito, Tilapia, ug Panggasius ngadto sa mga katawhang Comvaleño. (gilbert cabahug/ids comval)
No comments:
Post a Comment