Compostela Valley Province- “Very timely” gyod ang paspas nga pagtukod sa probinsiya ug Kindergarten School Buildings ilalom sa Bayanihan sa Paaralan Program ni Gov. Uy, ug matud ni OIC Schools Division Superintendent (SDS) Dr. Feliciano Tamondong nga siya maoy usa niadtong labing nalipay tungod kay gisugdan na karong tuiga sa Department of Education (DepEd) ang pag-implementar sa bag-ong balaod ilalom sa K+12 in Basic Education ni Presidente Benigno S.Aquino-III.
Kini panahon sa Ceremonial Kick-off sa gisugdan pagpabarog nga lima ka Kindergarten School Buildings sa probinsiya ilalom sa Bayanihan sa Paaralan Program ni Gov. Arturo “Chiongkee” Uy diha sa pampublikong mga tulunghaan sa elementarya sa mga lungsod sa Pantukan, sa Mabini, ug sa Compostela niadtong Pebrero 28,2012.
Matud ni Tamondong nga sa sunod abri sa klase iimplementar na sa DepEd ang K+12 ni Pangulong Aquino pinaagi sa R.A. 10157 nga naaprobahan niadtong Enero 20, 2012.Tungod niini mas midaghan gyod karon ang panginahanglan ug classrooms diha sa pampublikong mga tulunghaan labi na sa elementarya.
Ilalom sa maong balaod gimando na sa presidente nga usa sa labing mahinungdanong requirements sa batang mo-enrol sa elementarya nga siya nakagradwar sa kindergarten, ug kinahanglan sad nga didto siya nakahuman niini sa usa ka Kindergarten School nga Accredited sa DepEd.
Gipabahilo sad ni SDS Tamondong nga karong summer buksan diha sa tanang Public Elementary School sa Comval ang Summer Class sa Kindergarten, aron nga kadtong mga kabataan nga husto na sa edad pag-enrol ug Grade-1 apan wala makaagi ug Kinder mahatagan gihapon sa gobyerno ug dakong kahigayonan nga makatungha karong tuiga luyo sa mga kabag-uhan ubos sa bag-ong balaod sa nasud. (gilbert cabahug/ids comval)
No comments:
Post a Comment