AGR misuporta sa DavNor convergence program

ni Noel Baguio

Madugangan na usab ang serbisyong medical, sosyal, ug uban pang serbisyo nga dalit sa Davao del Norte Convergence for Peace and Development program ngadto sa mga lagyo ug kabus nga mga barangay sa probinsya.

Kini human nga misaad si 1^st District Congressman Anthony G. del Rosario nga mohatag siya ug P800,000 aron maapil sa convergence ang dugang serbisyo sa pagpatambal sa mga pasyente nga dunay sakit sa cancer, ug apil ang screening sa breast cancer, prostate cancer, ug cervical cancer.

Kini ang gipaniguro sa kongresista human nga iyang gipangunahan ang ika-tulo nga convergence program didto sa Barangay Igangon sa Lungsod sa San Isidro, Davao del Norte, sa milabay nga adlawng Biyernes.

Kauban ni Cong. del Rosario sila Vice Gov. Victorio Suaybaguio, Jr. ug 1003^rd Infantry Brigade Commander Col. Lysander Suerte, Mayor Rosebella Abelita-Nana, ug lakip na ang ubang mga department heads sa Kapitolyo.  

“Nalipay kaayo ako sa convergence mao nga kami sa congressional office we have decided to join in and help out by providing funds,” sulti ni del Rosario atubangan sa mga local officials.

Gawas sa suporta sa Tutok Kubeta program, gisugdan pod sa kongresista ang hinabang alang sa persons with disabilities. Iyang gitunol ang pares sa scratches ngadto kang Dino Caso, nga dunay physical deformity sugod pa sa iyang pagkaanak.

Gipangunahan usab ni Cong. del Rosario ang pag-inagurar sa water system sa barangay nga gipunduhan sa iyang P1-million per barangay program ubos sa iyang priority development assistant fund (PDAF).

Sa gihimong konsultasyon sa lideres sa barangay, gipaniguro usab sa kongresista nga iyang dugangan ang pondo aron i-expand ang maong water system, apil na usab ang pondo alang sa pagtiwas sa terminal sa barangay ug lakip na ang alang sa sugang daguitabnon sa pipila ka mga purok.

Butyag gihapon ni del Rosario nga muabotay karong tuiga ang dugang P70 million alang sa padayong pagpataas ug pagsemento sa 25-kilometro nga Zero Asuncion Road nadulong Laak, ComVal Province, nga moagi sa Igangon.