Ilalom sa temang Comval ... Shines at 14, Going Green, gipahigayon sa ikaduhang adlaw sa pagsasulog sa 5th Bulawan Festival sa Compostela Valley ang usa ka Simultaneous Tree Planting niadtong Marso 6 sa buntag, ug ilalom sa pagpanguna ni Gov. Arturo “Chiongkee” Uy gitanom niadtong adlawa sa mga katawhang Comvaleño ang mokabat 500,000 ka punoan sa mga kahoy.
Ang dungan nga pagpananom ug kahoy sa mga katawhan gisugdan sa alas 6 sa buntag, ug misalmot sa malampusong simultaneous tree planting ang mokabat 50,000 mga Comvaleño gikan sa kapitolyo paingon sa onse ka mga lungsod, sa Kabaranggayan, hangtud sa Sitio ug sa mga Purok. Matag-usa kanila nagtanom ug napulo ka punoan nga maoy pamagi aron makab-ot ang gikasabotang target nga 500,000 ka punoan sa lain-laing semilya sa kahoy.
Ang maong kalihokan maoy usa sa mga dagkong layat nga gihimo sa Probinsiya ilalom sa Provincial Greening Program ni Gov. Uy nga nagtumong sa pagtanom ug 20,000,015 ka punoan sa kahoy sa dili pa matapos ang 2015, kon “20,000,0015 trees in 20015.”
Sa pagkakaron ang nagkahiusang mga lideres ug katawhan sa probinsiya nakahimo na pagtanom sa mokabat 1.8 milyones ka punoan sa kahoy, ug kasagaran sa ilang natanom mao ang similya sa mga kahoyng Mahogany, sa Falcata, sa Narra, sa Acacia Mangium, sa lain-laing klase sa mga prutas, ug sa mga High Value Commercial Crops (HVCC) nga naglangkob sa rubber, sa cacao ug kape. (gilbert cabahug/ids comval)
No comments:
Post a Comment