Tuesday, March 13, 2012

Dul-an 12,000 Runners miapil sa Bulawan Fun Run sa Comval


Compostela Valley Province – Miabot gyod sa 11,961 ang runners nga miapil sa  malampusong Bulawan Fun Run sa Compostela Valley, ug kini maoy giilang  nag-una sa record nga dunay pinakadaghang partisipante sa mga nahitabong Fun Run sa kapupud-an sa Mindanao.

Matud ni Gov. Uy nga mga estudyante ang 3,945 sa dul-an 12 mil runners nga miapil niadtong adlawa, ug labing daghang runners ang midagan sa kategoryang 3K nga miabot gyod sa 9,014 runners. 2,731 sad kanila ang midagan sa kategoryang 5K. Samtang, miabot lang sa 216 ang midagan sa kategoryang 10K.

Ang Bulawan Fun Run maoy labing unang mga kalihokan nga gipasiugdahan sa probinsiya panahon sa 5th Bulawan Festival nga mao ang dakong selebrasyon atol sa pagsaulog sa 14th Founding Anniversary sa Compostela Valley .

Kini gisugdan sa alas 5:30 sa kaadlawon, ug mismong si Gov. Arturo “Chiongkee” Uy maoy nagdeklara sa  pagsugod niini dungan usab sa iyang opisyal nga pagdeklarar sa pagsugod sa 5th Bulawan Festival sa probinsiya.
Unang nanagan ang runners sa kategoryang 10K kon lumba dagan sa 10 kilometrong gilay-on nga nagsugod diha-diha human gipabuto ni Vice Gov. Ramil Gentugaya ang mando pagsugod kon Gunstart sa alas 5:51 sa buntag. Samtang si Gov. Uy mao sad ang nagpabuto sa mando pagsugod sa kategoryang 5K.

Tungod  sa grabe kadaghan sa mga partispante, ang kategoryang 3K gibahin sa duha ka grupo ug si Cong. Maricar Zamora-Apsay maoy nagpabuto alang sa mando pagsugod sa unang grupo. Si SP Member Moran Takasan mao sad ang mitiro sa gunstart alang sa ikaduhang grupo.

Matud ni CADS Chief Executive Assistant Raul Timogtimog(Bulawan Fun Run Coordinator) nga ila na untang giundang ang registration sa alas 12:00 sa udto niadtong Biyernes (Marso 2). Apan sa Marso 3 sa kaadlawon ila ra gihapong gipadayon ang registration tungod sa daghan pang mihangyo nga moapil. (gilbert cabahug/ids comval)

No comments:

Post a Comment