DepEd, nipahinumdom sa ilang mga patakaran kalabot sa adlaw sa gradwasyon

Subling nipahinumdom ang Department of Education (DepEd) sa ilang mga patakaran kalabot sa adlaw sa gradwasyon.

Giklaro ni DepEd Assistant Secretary Tonisito Umali nga bawal gayud mangolekta og graduation fees ang pamunoan sa mga pampublikong tunghaan.

Base sa DepEd Order No. 7, series of 2016, ang pondo alang sa pagtapos maggikan sa maintenance and other operating expenses ubos sa 2016 budget sa eskuwelahan.

Apan mahimong mangayo og boluntaryong kontribusyon ang Parents-Teachers Association (PTA) ug angay nga dili gayud kini ipamugos.

Tugotan usab ang pagpanghatag sa maong asosasyon og solicitation letter. Apan kun ang sulat gilagdaan sa head teacher, magtutudlo o sa bisan kinsang kawani sa DepEd, may tulobagon sila ug mahimong ma-reprimand o taktakon sa pwesto depende sa gibug-aton sa sala.

Samtang walay silot nga mahimong ipahamtang sa mga ginikanan nga magdumili sa paghatag og donasyon. (PIA)