Sa Comval: 630 pasyente sa Brgy. Manurigao naserbisyohan sa Health Outreach

 Compostela Valley Province--- Miabot gyod sa 630 ka mga pasyente sa Brgy. Manurigao ang naserbisyohan sa tulo ka adlawng Health Outreach nga libreng gitunol sa mga Staff sa Provincial Health Office sa pagpanguna ni PHO Chief Dr. Renato Basañes niadtong Septyembre 9-11, 2015 nga kabahin sa mas gipakusog nga preventive aspect sa Health Services Delivery nga hugtanong gipatuman sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, Senior Board Member Tyron Uy, ug SP Members.

629 kanila ang nakabenepisyo sa libreng konsulta sa Doktor, 85 sa libreng ibot og ngipon, 14 mga kabataan sa libreng tuli, ug duha ka mga inahan sa libreng pre-natal check-up nga diin ang tanan kanila gipanghatagan sa libreng mga tambal ug libreng Multi-Vitamins.

Sa milabayng Hulyo 2015 opisyal nga gipahibalo ni Gov. Uy ang planong pagsulod sa Provincial Health Outreach diha sa Brgy.Manurigao aron dalitan sa libreng serbisyo sa panglawas ang mga katawhan sa barangay nga gipuy-an sa kapin kon kulang 1,700 ka mga individual nga 100% sakop sa Mandaya Tribe.

Gisulti kini sa Gobernador human ang Report ni Senior Board Member Tyron Uy mahitungod sa tulo ka adlaw niyang Exploratory Visit sa Mandaya Village sa Barangay Manurigao ug sa usa sa pinaka nindot nga busay sa probinsiya nga mao ang Malumagpak Falls niadtong Hulyo 14-16,2015.

Gihulagway sa batan-ong Uy ang nahisgutang barangay nga kini naa sa tungang bahin sa usa ka forest area sa New Bataan nga gipuy-an sa kapin kon kulang 1,700 ka mga individual nga lun-lon Tribung Mandaya ug pipila lang sa mga magtutudlo nga nakasagol ang dili IP.

Sulti sad niya nga sulod lang sa tulo ka adlaw niyang pagbisita personal niyang nasaksihan ug nasinati ang talagsaong bahandi sa kinaiyahan nga padayong gitipigan sa  usa ka Community nga lunlon IP ang mga residente, ug sulod sa mubong panahon nga pagpakig-uban kanila siya nakadayeg ug dako sa talagsaong kabuotan ug hospitality nga padayong gibansay sa Tribu subay ang ilang lumadnong kultura. Gani matud pa usab niya nga walay problema sa pagkaon ang mga katawhan didto timaan sa ilang pagkakugihan. (gilbert cabahug/ids comval)