P19.5-B PARA SA MGA BUB PROJECTS SA MINDANAO ABAD: BUB PARA SA KALINAW, KAHAPSAY UG KALAMBOAN

Gipahigayon ang Bottom-up Budgeting (BUB) Summit sa Dabaw karong semanaha aron ipahibalo ang mga kalamboan dinha sa implementasyon sa mga BUB projects nga mikabat na sa P19.5 bilyones, gikan 2013 ngadto sa 2016 alang sa mga grassroots communities sa Mindanao Cluster.

Ang maong summit gipahigayon karong Setyember 29 hangtod Oktubre 1 sa Apo View Hotel sa Dakbayan sa Dabaw. Gibanabana nga mokab-ot sa 450-500 ka mga representante gikan sa mga civil society organizations (CSOs), national government agencies (NGAs), ug local government units (LGUs) ang motambong.

Adunay unom (6) ka administrative regions ang Mindanao Cluster nga milambigit sa programa sukad gilunsad ang BUB niadtong 2013. Ang mga mosunod nga cluster mao ang Zamboanga Peninsula, Northern Mindanao, Davao, SOCCSKSARGEN, and the CARAGA regions.* Sa pagkakaron, nakadawat ang cluster og P19.5 bilyones nga budget alang sa 15,539 ka mga proyekto. Lakip dinhi ang P5.98 bilyones para sa 3,532 ka mga proyekto sa ilawom sa 2016 National Expenditure Program (NEP).

“Gimugna ang BuB program aron matagaan ang mga grassroot communities og mas dakong tingog dinha sa proseso sa paghimo sa Nasudnong Budget. Para sa Mindanao, nakatabang ang maong programa sa paghatag serbisyo-publiko ngadto sa mga lumulupyo sa mga lagyong lugar ug sa kaayohan sa LGU sa mga lugar nga naglisod ug nagkagubot,” matud ni Kalihim Florencio “Butch” Abad sa Department of Budget and Management (DBM).

“Kung malinawon ug hapsay ang Mindanao, dako ang among pagsalig nga molambo ang mga lumulupyo ug makabenepisyo sila sa kauswagan nga alang sa tanan,” pulong ni Abad.

Ang mga mosunod mao ang listahan sa BuB budget allocation ug ihap sa mga proyekto alang sa Mindanao Cluster*:

Budget Allocation   
2013: P3.14B   
2014: P5.44B   
2015: P4.96B   
2016(gitanyag): P5.98B   
Kinatibuk-an: P19.5B

Ihap sa mga proyekto
2013: 2,587   
2014: 5,819   
2015: 3,601   
2016(gitanyag): 3,532   
Kinatibuk-an: 15,539

Ang maong programa gipangulohan sa National Anti-Poverty Commission (NAPC) ug gisuportahan sa Department of the Interior and Local Government (DILG), Department of Budget and Management (DBM), Department of Social Welfare and Development (DSWD), ug ang National Economic and Development Authority (NEDA).

Sama sa mga summit nga gipahigayon kaniadto sa Manila ug Subic, ang tinguha sa BuB Summit sa Dabaw mao ang pag-usbaw sa BuB planning process ug pagdali sa implementasyon niini. Adunay mga panaghisgot nga pagahimoon kung unsaon pagpakusog sa partnership tali sa LGU ug CSO, pagpalig-on sa kapasidad sa pag-implementar sa mga proyekto sa BuB sa mga lokal nga kagamhanan, ug unsa ang mga angayang pamaagi sa pagpahibalo sa tanan og unsa ang mga tinguha sa BUB.

 
“Pinaagi sa BuB, makatabang ang mga LGU ug CSO sa pagpili sa mga importanteng poverty-reduction projects nga mahimong ipahamutang sa ilang mga lokalidad. Ug mamahimo nang parte sa decision-making process alang sa mga lokal nga proyekto ang mga taga-Mindanao. Ang BUB ang mohatag og kusog sa katawhan,” sumala ni Abad.

Karong 2015, adunay 1,590 ka mga lungsod ug dakbayan sa tibuok nasud ang gipailawom sa BuB program nga mokantidad sa P20.9 bilyones.  Para sa 2016, gitanyag nga mokab-ot sa P24.7 bilyones ang BuB program isip suporta sa implementasyon sa kapin 14,300 ka mga BuB projects sa tibuok nasud.

*Lakip ang Autonomous Region in Muslim Mindanao (ARMM) sa Mindanao Cluster sa BUB program. Apan wala dinhi ang mga datos sa BUB projects sa ARMM.

For inquiries, further questions and requests for interview, please contact:
OSEC-Public Information Unit
791 - 2000 local 2602; 0908-869-8170;

media@dbm.gov.ph
Facebook: /DBMphilippines
Twitter: @DBMph