Comval SP giaprobahan ang laing P70 M Road Concreting Project sa Monkayo

Compostela Valley Province–Samtang nagsingabot ang pagsugod sa P77 Milyones nga Road Concreting Project sa “Brgy. Union-Brgy. Upper Ulip FMR Section” sa Monkayo, ang Comval SP sa pagpanguna nila ni Vice Gov. Manuel “Way Kurat” Zamora ug Senior Board Member Tyron ang mihimo sa paspas nga mga lihok alang sa daling pag-implementar sa laing P70 Milyones nga Road Concreting Project sa lungsod nga gitunol gihapon sa Comval ni Pangulong Benigno S. Aquino III pinaagi sa DILG ilalom sa “Payapa at Masaganang Pamayanan (PAMANA) Program”.

Kabahin sa hiniusang mga paningkamot ang daling pag-aprobar sa usa ka kasabotan(MOA) nga gihimo  tali sa DILG ug sa PLGU Comval alang sa laing P70 Milyones nga Road Upgrading(Gravel to Concrete) Project, nga diin maoy gisaligan sa dali ug paspas nga pagtrabaho niini ang liderato sa probinsiya sa pagpanguna ni Gov. Arturo “Chiongkee” Uy pinaagi sa Provincial Engineer’s Office(PEO).

Gisulti mismo ni Florentino Go sa PPDO, nga moabot sa kapin 3 ka kilometro ang gilay-on sa road section nga sementohun gamit ang maong pundo nga magsugod sa Junction National Highway Brgy. Banlag paingon sa Brgy. Casoon nga pulos sakop sa lungsod sa Monkayo.

Ang pag-aproba nahitabo human giuyonan pinaagi sa boto nga unanimous sa tanang SP Members nga mitambong sa 57th Regular Session nga gidumala ni Vice Gov. YK ang duha mga resolutions nga giduso nila SP Members Joseph Jaoud, Raul Timogtimog, Arvin Dexter Lopoz, Neri Barte ug Macario Humol.

Unang resolution ang pag-adopt sa Draft MOA tali sa PLGU Comval ug sa DILG alang sa P70 Milyones nga Road Upgrading (gravel to concrete) sa Junction National Highway Brgy. Banlag paingon sa Brgy. Casoon nga pulos sakop sa Monkayo. Ikaduhang resolution mao ang paghatag ug katungod kang Gov. Uy aron pirmahan ang gihimong kasabotan.

Apil sa mga miboto pabor sila Senior Board Member Tyron Uy ug SP Members Atty. Ruwel Peter Gonzaga, Atty. Arvin Dexter Lopoz, Moran Takasan, Paul Galicia, ug Cesar Richa. Pabor usab sila Vice Gov. YK, SP Member Ramil Gentugaya, SP Member Agusto Blanco Jr. ug uban pa. (Gilbert M. Cabahug/IDS Comval)