“Ang Akong Probinsiya Module” gihimo sa Comval"

Compostela Valley Province–Gawas sa padayong mga paningkamot nga gihimo aron mas motaas pa ang kalidad sa edukasyon sa Comval, ang liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, naninguha usab nga molambo ang kahimatngon (awareness) sa mga katawhan ug ilang mga anak sa kasayuran sa kaugalingong lugar  pinaagi sa paghimo ug usa ka Instructional Module nga nag-uluhan ug “Ang akong Probinsiya” maoy mamahimong Local Reference ug opisyal nga pagabasehan sa teachers panahon sa ilang pagtudlo sa Araling Panlipunan diha sa Grade-3.       

Partner sa probinsiya niini ang Comval DepEd nga nagpili og 14 ka Araling Panlipunan Teachers sa Grade-3 gikan sa 14 usab ka School Districts sa probinsiya nga maoy gitahasang writers, ug kabahin sa ilang pagsugod sa makuting mga buluhaton ang duha ka adlawang writeshop nga gidumala ni Dr. Grace Pontillas ang bag-o natudlong  Education Program Supervisor sa “Araling Panlipunan and Values Education” sa Comval DepEd.

Ang duha ka adlawang Writeshop diha himoa sa Comval Hotel and Restaurant sa Nabunturan niadtong Septyembre 12-13, 2014.Apan sa wala pa nila himoa ang writing session adunay libreng mga pagbansay kon unsaon paghimo ang module, ug apil sa ilang mga Facilitators ang College Professor sa University of Southeastern Phlippines (USEP) sa Tagum City nga si Dr. Roque Langcoy ang kasamtangang Chairman sa Elementary Education Department. Facilitator sad nila ang laing College Professor sa USEP nga si Dr. Virginia Nillas ang kasamtangang Research Division Coordinator  sa mao gihapong eskwelahan.

Aron sayon sa mga writers nga makakuha sa gikinahanglang materyal ug mga mahinungdanong kasayuran nga gamiton sa gisulat nilang module sila gitabangan sa pipila ka mga opisina sa probinsiya sama sa Provincial Planning and Development Office(PPDO), ug sa duha ka mga opisina ni Gov. Uy nga mao ang PGO- Tourism Office,  ug ang PGO-Information Dissemination Section (IDS). Mitabang usab kanila nini ang lain-laing opisina sa mga munisipyo pinaagi sa paghatag  usab kanila sa mga mahinungdanong datos panahon sa ilang research sama sa gihimo sa nahisgutang mga opisina sa probinsiya. (gilbert cabahug/ids comval)