Compostela Valley Province - Panegurohon nga limpyo ang karne nga gibaligya diha sa mga palengke, ug nga kini luwas sa kontaminasyon ug sa mga sakit aron dili makatakod ug makadaot sa mga katawhang Comvaleño. Kini maoy rason nga gipaningkamotan karon sa liderato sa probinsiya ilalom sa pagdumala ni Gov. Arturo “Chiongkee” Uy nga mapahugtan pa ang nagpadayong pag-implementar sa probinsiya sa D.A. A.O. No. 19 Series of 2010 nga mao ang bag-ong “Guidelines on Good Hygenic Slaughtering Practices” alang sa “Locally Registered Meat Establishments (GHSP-LRMEs)” sa tibuok nasud.
Ang bahin sa nahisgutang “guidelines” maoy pipila sa mga labing mahinungdanong butang nga gihisgotan panahon sa gihimong panagtigom diha sa kapitolyo sa mga Veterinary Officers sa probinsiya ug sa mga kalungsuran uban ang mga Meat Inspectors, Livestock Inspectors, ug Agricultural Technicians panahon sa 3rd Provincial Livestock Development Council Committee (PLDCC) Consultative Meeting sa Comval.
Ang usa ka adlawng panagtigom gidumala sa probinsiya pinaagi ni Provincial Veterinarians Office Chief Dr. Benjamin S. Reyno nga maoy nag re-echo sa mga mahinungdanong butang nga angay sundon sa mga katawhan sa pag-ihaw, sa pagmatada, ug sa pagbaligya ug karne nga gimando sa balaod ilalom sa DA AO No. 19 nga gipagula sa kauluhan pinaagi sa Department of Agriculture niadtong 2010.
Matud ni Dr. Reyno nga ang maong kamandoan nanukad sa R.A. 9246 kon Meat Inspection Code of the Philippines nga maoy gihimong legal basis alang sa mas komprehensibong Meat Control System sa nasud nga giimplementar pinaagi sa mga LGUs ilalom sa Strategic Action Plan and Program 2009-2019 sa kauluhan kon 10 Year Strategic Action Plan and Program for LGUs (10Y SAPP).
Atol sa gihimong panagtigom gikasabutan ang hugtanong pag-implementar sa maong balaodnon pinaagi sa pagmugna sa Provincial Meat Inspection Service (PMIS) sa Comval nga maoy gihatagan ug tahas, buluhaton, ug dakong katungod sa paghimo’g lain-laing mga kalihokan aron maseguro ang food security sa tibuok probinsiya ug nga ang mga pagkaon luwas ug seguradong makahatag ug dakong kaayohan sa publiko.
Ang PMIS gihatagan sad ug dakong responsibilidad, tahas, ug buluhaton sa pagtudlo ug pagtabang sa publiko sa proper handling sa mga pagkaon labi na sa karne ug sa meat products nga naglangkob sa proper handling and preparation, storing, processing, ug sa pagpreserbar niini. (gilbert cabahug/ids comval)
No comments:
Post a Comment