Gov. Uy suportahan ang E.O. 79 ni Pangulong PNoyAquino

Compostela Valley Province – Bisan siya dakong pabor ug iya gyong suportahan ang Executive Order No.(E.O) 79 ni Presidente Benigno S.Aquino III, apan matud ni Gov. Arturo “Chiongkee” Uy nga hangtud karon wala siyay himoong mga lakang aron nga kini hugtanong ipatuman sa probinsiya tungod kay iya pa unang hulaton ang usa ka detailed map gikan sa Mines and Geo-Sciences Bureau (MGB) sa mga lugar sa probinsiya nga gidili na ang pagmina ilalom sa maong kamadoan sa presidente.

Matud sa gobernador nga “very broad” ang mga provision sa E.O. 79 nga gipagula sa presidente mao nga dili pa makalihok ang probinsiya aron sa pag-implementar niini.  Kinahanglan matud pa nga masayran ug maklaro una diha sa mapa ang specific areas nga gidid-an  ang mga katawhan sa pagmina.

Niadtong Hulyo 6, 2012 gipagula ni Pangulong Aquino ang iyang E.O. 79 nga mao ang pag-institutionalize ug pag-implementar sa mga reporma sa Philippine Mining Sector, nga naglakip sa pagbutang sa mga palisiya ug mga gabayan aron maseguro nga kapanalipdan ang kinaiyahan luyo sa pagpahimulos sa mga natural resources pinaagi sa responsableng pagmina.

Giilang dakong hagit sa mga LCEs labi na sa probinsiya sa Compostela Valley ang pipila sa mga mahinungdanong provision sa balod ilalom  sa Section 1 sa maong E.O. nga naghisgot sa mga lugar nga hugtanong gidili ang pagmina sama sa mga giilang Tourism Development Areas; sa Water Shed Areas; sa Agricultural Areas nga naglakip sa mga plantasyon, sa mga lugar nga devoted sa valuable crops, sa mga giilang strategic agriculture and fisheries development zones, ug sa mga giilang fish refuge and sanctuaries; sa uban pang giilang critical areas sama sa Island Ecosystems ug sa mga giilang impact areas sa mining ug uban pa.

Apan giklaro karon ni Gov. Uy nga kon duna nay detailed map ang DENR andam na gyod siya sa pagpatuman sa gipagulang kamandoan sa presidente labi na nga mining areas ang siyam ka mga lungsod sa Compostela Valley. 

Kon ugaling duna nay minero diha sa mga lugar nga gidli sa balaod ang pagmina base sa E.O.79, matud sa gobernador nga iya silang hinabion  aron hinay-hinay nga mamahawa. Samtang sa mga lugar nga wala pay minero iyang imando dayon ang hugtanong pagpatuman sa “no mining policy” sa maong lugar. (gilbert cabahug/ids comval)