DAVAO Oriental – Ang lokal nga kagamhanan dinhi nga probinsya ilawom sa adminsitrasyon ni Gobernador Cora Malanyaon, adunay 21,700 ka nagkalainlaing klase sa semelyang kahoy nga andam na itanom.
Ang mao nga mga semelya nga gipaturok nunot sa espesyal nga programa sa Gobernador nga mao ang Million Trees Movement of Davao Oriental, naglangkob sa mga kahoy nga mahogany- 16000 ka punoan, acacia- 1000, narra- 2000, falcata- 1000, ug neem tree- 700 ka punoan.
Forester Claudio Mirafuentes, nursery in-charge sa ENRO-Davao Oriental Provincial Nursery nagbutyag nga ang mao nga mga semelya nga nahimutang sa Sitio Magay, Don Martin Marundan, Mati City, aduna usab mga bag-ong pinaturok nga 3000 ka semelyang mahogany.
Dugang pa ni Forester Mirafuentes nga ang ENRO adunay andam kanunay nga mga semelya nga ipang-apod-apod ngadto sa mga barangay ug mga tulunghaan subay sa kamandoan ni OIC-ENRO Dante M. Ganir kay gusto sa Gobernador nga adunay ikahatag dayon nga mga semelyang kahoy ngadto sa daghang nangayo aron itanom sa nagkalainlaing dapit sulod sa probinsya. (Sarx Lanos/IPID News Service)
No comments:
Post a Comment