AFRIM: Tungod sa FMR Project sa OPAPP pletehan sa Brgy. Panansalan miubos ug 50%

Compostela Valley Province - Aminado karon ang grupong Alternate Forum for Research in Mindanao(AFRIM) Inc. nga miubos na gyod ug mga 50% ang singil sa pletehan gikan sa Brgy. Panansalan paingon sa lungsod sa Compostela. kini tungod sa malampusong pagpang-ayo sa probinsiya sa mokabat 12 ka kilometrong Farm to Market Road (FMR).

Apan luyo sa nahitabong pagkunhod sa singil sa pletehan wala pa gihapon makontento si Gov. Arturo “Chiongkee” Uy tungod matud pa niya nga mahal pa gihapon ang singil sa pletehan. Mao nga iyang gimandoan si PEO Chief Engr.

Rhoderick Digamon nga bisan human na ang proyekto base sa Program of Works (POWs) ipadayon pa gihapon sa probinsiya ang Road Rehab ug labing maayo matud pa nga masemento ang portions nga magbalik-balik lang ug kaguba panahon sa ting-ulan.

Ang grupong AFRIM maoy nagpresentar kang Gov. Uy sa resulta sa malampusong Road Users Satisfaction Survey (RUSS) nga ilang gihimo sa  tulo ka mga sub-projects sa OPAP-PAMANA diha sa Comval panahon sa pipila ka oras nga Exit Conference sa kapitolyo niadtong Hulyo 27,2012.

Kining mga proyektoha mao ang gihimong pag-rehab sa hanging Foot Bridge sa Brgy.Camansi Montevista; ang padayong pagpang-ayo sa 12 km nga FMR sa Brgy. Panansalan sa Compostela; ug ang Construction sa usa ka FMR Project with Bridge Component diha sa San Isidro-Prosperidad Section nga nagsumpay sa Montevista ug Monkayo.

Implementing agency niini ang DSWD ug ang DILG. Apan dunay kasabotan (MOA) sila si Gov. Uy ug ang DND pinaagi sa OPAPP nga maoy mangamot sa pagtrabaho ang probinsiya pinaagi sa Provincial Engineer’s Office.

Matud ni Gov. Uy nga sa iyang pag-adto sa Brgy. Panansalan panahon nga siya Board member pa lang miabot gyod sa kapin tulo ka oras ang biyahe tungod kay grabe kalisud ang karsada. Mao nga siya nakapanaad sa katawhan nga iya gyong tutokan ang pag-ayo sa maong dalan aron mo arang-arang ilang kahimtang.

Human sa iyang paglingkod isip gobernador niadtong 2007 iya dayong gipaningkamotan nga maka source-out ug pundo gikan sa lain-laing mga tinubdan sa tuyo nga madali ang pag-ayo niining karsadaha luyo sa kakulang ug pundo sa panudlanan sa probinsiya. Tungod sa OPAPP nalipay gyod siya’g dako kay natabangan  ang iyang dakong tinguha nga mahuman ug dali ang Road Repair sa Panansalan. (gilbert cabahug/ids comval)