Thursday, April 19, 2012

Provincial Legal Officer(PLO) sa ComVal bag-o na


Human sa dul-an duha  ka tuig nga pagkabakante sa position, duna na karoy bag-ong Provincial Legal Officer ang Compostela Valley ug siya mao na si Atty. Richard Bermudez Liban. Mismong si Provincial Administrator Virgilia Allones maoy opisyal nga nagpahibalo niini atol sa convocation program sa kapitolyo niadtong Abril 16.

Si Atty. Liban maoy kanhi usa sa mga Senior Associate Lawyers sa Aguirre, Aportadera, Gavero, Lacierda & Sandico Law Offices didto sa Ortigas Business District, Pasig City,Metro Manila. Gikan didto siya  mibalhin pagtrabaho, ug sa iyang pagbalhin siya maoy nahimong Regional Legal Counsel sa  Associated Labor Unions ilalom sa Trade Union Congress of the Philippines (ALU - TUCP) sa Southern Mindanao Region.  

Siya nagtungha sa kolehiyo sa Ateneo de Davao University sa kursong AB-Sociology, ug bisan sa iyang pag gradwar  sa maong kurso nagpadayon gihapon siya sa iyang pagtungha. Niining higayona iyang gieskuwelahan ang kursong abogasiya sa Ateneo De Davao College of Law. Si Atty. Liban natawo niadtong Marso 30,1972. Ang iyang amahan mao si Ruben C. Liban ug ang iyang inahan mao si Gloria Bermudez Liban.

Kasagaran sa iyang mga suod nga higala magtawag kaniya ug “Tata”. Ang kanhi Provincial Legal Officer sa Compostela Valley nga si Atty. Jessie Villegas nag-resign sa iyang trabaho sa kapitolyo niadtong Hulyo 30,2010 sa rason  nga mas miangay siya nga mag-private practice sa iyang profession.

Apan sulod sa pipila ka bulan human sa iyang resignation padayon gihapon siya nga nagatabang sa probinsiya isip  usa ka legal consultant. Si Atty. Liban maoy nahimong Legal Consultant sa probinsiya human sa pagbiya ni Atty. Viilegas, ug siya nagsugod niining trabahoa niadtong Hulyo 1,2011. Matud ni P.A. Allones nga panahon sa pagtrabaho ni Atty. Liban isip Legal Consultant sa Probinsiya nakatabang gyod ug dako ang iyang mga maayong legal opinions,  ug ang gitudlo niyang legal remedies dako gyod kaayo’g gikatabang aron magpadayon ang kahan-ay ug kahapsay sa pagpadagan sa kagamhanang lokal sa probinsiya sa Comval.

Kini maoy nag-unang rason nga siya maoy gipili ni Gov. Uy aron maoy molingkod isip bag-ong PLO sa Comval. (Gilbert M. Cabahug, ids-comval)

No comments:

Post a Comment