CVSP Scholars gitanyagan ug trabaho

Compostela Valley Province - Duha gyod ka mga kompanya ang mitanyag ug trabaho sa CVSP Scholars nga migradwar sa ilang pagtungha karong tuiga, ug mismong si Gov. Arturo “Chiongkee” Uy maoy malipayong nagpahibalo niini atol sa  gihimong General Assembly ug Carpe Diem niadtong Abril 20, sa tanang daang CVSP Scholars nga nagatungha sulod sa School Year 2011-2012 nga giapilan niadtong mga migradwar karong tuiga ug niadtong magpadayon pa sa  ilang pagtungha.

Matud ni Gov. Uy atol sa iyang paghatag ug mensahe, nga mapasalamaton siya kay ang Apex Mining Company ug Southernland Call Center Agency nakig-uban kanila aron sa pagpahibalo nga ang mga eskolar sa probinsiya nga nakahuman na sa ilang pagtuon maoy gihatagan ug priority sa duha ka kompanya alang sa Job Inteview nga maoy mamahimong bentaha nila sa ubang mga applikante sa gihanyag nga trabaho.

Ang Edukasyon matud sa gobernador maoy maghatag ug dakong kausaban sa kinabuhi sa tawo gikan sa iyang kawad-on ug kalisud ngadto sa maayong kahimtang.

Mao nga iyang gipaningkamotan nga matabangan usab sa gobyerno ang mga kabataan nga makapadayon sa ilang pagtungha pinaagi sa paggahin ug dakong pundo alang sa scholarship program.

Apan luyo sa dakong oportunidad nga gihatag kanila, kinahanglan sad nga ilang paningkamotan  nga makaangkon sila ug taas nga kinaadman pinaagi sa pagkugi ug tuon.

Kay kini maoy mamahimo nilang bahandi nga maghatag ug dakong kausaban sa ilang kinabuhi gikan sa kawad-on ngadto sa hamugaway nga kahimtang.

Gipasabot sa gobernador nga sama kanila siya usab usa ka scholar, ug gani duha lamang sila nga nahimong palaran nga nakapasar sa scholarship exam niadtong 1969 sa Mindanao State University (MSU) sa Marawi City. Apan wala lang siya magdayon pagtungha didto tungod sa pag duha-duha sa seguridad sa lugar, labi na nga kusog kaayo didto niadtong panahona ang rallies ug demonstration.

Mao nga diha na lang siya nag-eskuwela sa kursong Engineering sa UM, Davao City tungod kay nag-excel siya sa Mathematics. Sama kanila, matud sa gobernador nga gikan sad siya sa kabus nga pamilya ug gani panahon sa iyang kabatan-on iya sad nga naagian ang pagpanigom ug botelya kauban ang iyang mga igsoon aron sila makatan-aw ug sine. Kay 25 centavos pa lang ang bayad sa sinehan kaniadto.

Dakog natabang kaniya ang kaestrikto sa iyang amahan sa edukasyon nga maoy nakahatag kaniya ug dugang kadasig nga maningkamot aron makahuman sa  iyang pagtuon.

Tungod sa iyang kasinatian nga lisud  magtungha nga walay kwarta mao nga sa iyang paglingkod isip gpobernador sa probinsiya iyang gipaningkamotan nga matabangan ang mga estudyante pinaagi sa mas gipalapdang scholarship program. (gilbert cabahug/ids comval)