ADB ug DSWD nakadayeg sa ATU Peace Program sa Comval

Tungod sa maayong sistema sa pag-implementar sa Probinsiya sa mga proyektong imprastraktura sa mga kabaranggayan sa 11 ka lungsod sa Compostela Valley subay ang sistema sa KALAHI CIDDS, hugot karon nga gidayeg sa mga dagkong opisyal sa Asian Development Bank (ADB) ug sa DSWD ang ATU Peace Program ni Gov. Arturo “Chiongkee” Uy.

Niadtong Abril 18, mibisita sa kapitolyo ang mga dagkong opisyal sa ADB sa pagpanguna ni Joel Mangahas ug ni Dir. Edgar G. Pato -  KC-National Project Manager sa DSWD ug mga kauban, aron sa pagpahigayon sa ilang scoping mission nga naglakip sa pag-evaluate sa lig-on nga koordinasyon tali sa DSWD ug sa Provincial LGU sa gihimong pag-implementar sa programang “Kapit-Bisig Laban sa Kahirapan-Comprehensive and Integrated Delivery of Social Serevices” kon KALAHI-CIDDS sa DSWD sa mga kabaranggayan.

Ang sistema sa paghatag ug mga proyekto ilalom sa programang KALAHI-CIDDS nagustuhan pag-ayo sa gobernador, ug tungod niini iya sad nga gimugna ang programang ATU-PEACE kon Assistance Towards Unity for Progress thru Empowerment, Accountability, Cooperation, and Efficiency, nga mao ang susamang version sa KALAHI-CIDDS sa DSWD apan  ang pundo sa probinsiya maoy gigamit alang sa giimplementar nga mga proyekto.

Ilalom sa ATU-PEACE kadtong mga Baranggay nga wala pay infra projects nga gihatag ang probinsiya maoy priority nga tagaan ug P300,000.00 pesos alang sa proyektong infra, apan ang mga katawhan mismo sa barangay maoy mopili sa proyekto nga gusto nilang iimplementar sa ilang Barangay.

Ang paghatag ug kahigayonan sa mga katawhan sa Brgy. nga makapili sa proyekto nga ihatag kanila sa gobyerno maoy usa mga labing mahinungdanong pamaagi sa DSWD pinaagi sa programang KALAHI-CIDDS  sa paghatag ug mga proyekto nga gisundog sa probinsiya ilalom sa ATU-PEACE Program sa gobernador.

Sa mokabat 251 ka mga Brgy. sa Comval, duna nay 166 ka mga Barangay sa 11 ka mga lungsod ang nakadawat ug proyekto gikan sa ATU PEACE Program ni Gov. Uy, nga nakahurot sa pundo nga mokabat P49.8M pesos gikan sa panudlanan sa probinsiya.

Siyam na ka Barangay ang nahatagan diha sa Pantukan, 8 sa Mawab, 14 sa Montevista, 32 ka barangay sa Laak, 18 sa Nabunturan, 16 sa Maragusan, 14 sa Monkayo, 11 sa Compostela, 24 na sa Maco, ug 10 na sad sa Mabini.

Sa 2012  naggahin na sad si Gov. Uy ug P25.2 Milyones alang sa 3rd batch aron ihatag sa lain pang 84 ka mga barangay sa probinsiya nga wala pa makadawat ug proyekto gikan sa ATU-PEACE. (gilbert cabahug/ids comval)