Thursday, April 26, 2012

Lusong sa kalsada sugdan sa Mayo


Aron daling masulbad ang dakong problema sa mga kadalanan sa ComVal nga nangadaot sa bagyong Sendong ug sa kusog nga mga pag-ulan niadtong mga bulan sa Enero ug Pebrero, sugdan na sa Mayo ang mas gipalapdang Lusong sa Kalsada ni Gov. Uy nga pagasalmotan sa probinsiya ug mga kalungsuran. Kini maoy nakab-ot nga kasabotan atol sa usa ka Joint Meeting sa mga staff sa Provincial Engineer’s Office (PEO) ComVal, ug sa Municipal Engineers sa 11 ka mga lungsod nga gitabangan pagdumala nila ni PEO Chief Rhoderick Digamon ug Executive Assistant Macario Humol sa kapitolyo niadtong Abril 19,2012.

Segun nasabotan, ilang gimugna ang duha ka team sa patrabahoong heavy equipments-usa sa distrito-1 ug laing usa sa distrito-2. Kada team dunay napulo ka heavy equipments nga naglangkob sa usa ka back hoe, 1-loader, 1-road roller, 2-grader, ug 5-dump trucks nga maoy modungan pagtrabaho aron daling mahuman pagpang-ayo ang mga karsada.

Matag LGU motampo sa dili momenos usa ka ekwipo, ug kini dugangan sa probinsiya aron makompleto ang required equipments sa kada team nga motrabaho sa himoong lusong. Gikasabotan sad nga ang probinsiya maoy moabaga sa gamitong krudo sa ayuhong Provincial Road Sections. Samtang, ang Municipal LGU maoy moabaga sa krudo kon ang tabangan ug ayo mao ang Municipal Roads ug Brgy. Roads sulod sa iyang teritoryo. Nagkasabot sad sila atol sa bag-o nahumang meeting nga maoy unang tabangan ug ayo ang daot nga Provincial Road  Sections tungod kay sama sa National Roads, busy kaayo kining karsadaha nga maoy nagkutay ug nagsumpay aron maglahos ang tanang Brgy. ug Municipal Roads.

Ang pipila sa mga Provincial Road Sections nga unahon pagtrabaho ilalom sa lusong mao ang 11.5 km. nga Sto. NiƱo-Panag-Cogonon Road sa New Bataan, ang 10 km. nga Araibo-Las Arenas-Tagugpo Section sa Pantukan ug Maragusan, ang 5 km. nga Anitapan-Mascareg-Luhog Section sa Mabini, ang 16.30 km. nga Elizalde-Panamin-Anitapan Section sa Maco ug Mabini, ug ang 49.08 km. nga Elizalde-New Leyte-Cambagang Section nga mao nagkutay aron maglahos ang mga lungsod sa Mawab, Maco, ug Maragusan.

Apil sad nga ayuhon mao ang 15.80 km. nga Nabunturan-Saosao-Nuevo Iloco section sa Nabunturan ug Mawab, ang 17 Km. nga San Roque-San Vicente Junction Highway sa Montevista ug Nabunturan, ang 17.85 km. nga Nabunturan-Gabi-Compostela Section sa Nabunturan ug Compostela, ang 8.80 km. nga Banlag-Casoon Section sa Monkayo, ug ang 13.30 km. nga Maragusan-Magcagong-Parasanon-Paloc Section sa Maragusan. Human sa Provincial roads magsunod dayon ang lusong sa pagpang-ayo sa Municipal ug Brgy. roads.

Apan ang final identification niini iduso sa municipal mayors panahon sa  ilang LMP Meeting nga dumalahon ni LMP Chair Mayor Reynaldo Navarro sa Laak. (gilbert cabahug/ids comval)

No comments:

Post a Comment