Thursday, April 26, 2012

Comval gipangandaman ang pag-abot ni Agriculture Sec. Alcala sa Mayo 10


Hugot karong gipangandaman sa liderato sa probinsiya sa Compostela Valley ang gitakdang pag-abot ni Agriculture Secretary Proceso Alcala sa kapitolyo karong Mayo 10, ug kabahin sa gihimong pagpangandam gidumala ni Gov. Arturo “Chiongkee” Uy ang usa ka meeting kauban sila si OIC D.A.

Region XI Executive Director Constancio C. Maghanoy ug PAGRO Chief Dr.Rolando Semene sa Governor’s Conference Room sa kapitolyo niadtong Abril 17 sa buntag. Kini aron han-ayon ang order of activities, ug ang uban pang mga kinahanglanon aron maseguro nga komportable gyod ang D.A. Secretary sa iyang pag-abot sa probinsiya.

Ang mga kalihokan sa iyang pag-abot pagasugdan pinaagi sa usa ka working breakfast uban sa gobernador sa alas 8:00 sa buntag kauban ang tanang Municipal Mayors sa 11 ka mga lungsod, SP Members nga gipanguluhan ni Vice Gov.Ramil Gentugaya,  ug si Cong. Maricar Zamora ug Cong. Rommel Amatong.

Gikasabotan sad nga panahon sa working breakfast dunay usa ka Audio Visual Presentation (AVP), ug pinaagi niini ipahibalo sa probinsiya ug sa mga kalungsuran ngadto sa D.A. Secretary ang lain-laing mga proyekto sa Department of Agriculture nga giimplementar sa mga kabaranggayan sa Comval nga naglakip niadtong mga proyekto nga nahuman, proyekto nga padayon pa nga ginatrabaho, ug kadtong mga proyekto nga aprobado na sa D.A. ug gitakdang pagasugdan karong tuiga.

Ipahibalo sad ang proposed agricultural projects sa Comval nga maoy pangayoon sa probinsiya ug mga kalungsuran nga tabangan sa kauluhan pinaagi sa paggahin ug pundo.

Sa Alas 10:00 sa buntag, si Secretary Alcala kuyog sa tanang mga opisyal sa probinsiya ug mga kalungsuran mangadto sa Nabunturan National Comprehensive High School Gymnasium aron himamaton ang mokabat 700 ka mga mangunguma nga bag-o lang migradwar sa nagapadayong pagtuon sa Agrikultura ilalom sa Farmer Fields School (FFS) Program ni Governor Uy nga gitabangan pag-implementar sa Probinsya pinaagi sa PAGRO ug sa Municipal LGUs pinaagi sa MAGRO. (gilbert cabahug/ids comval)

No comments:

Post a Comment