Thursday, April 19, 2012

Gov. Uy midayeg kang P-Noy tungod sa lig-ong determinasyon aron masulbad ang Power Crisis


Luyo sa managlahing baroganan sa pamaagi tumong sa kasulbaran sa nasinating krisis sa kuryente sa Mindanao,  giklaro karon ni Gov. Arturo “Chiongkee” Uy nga nakadayeg siya sa lig-on ug hugot nga determinasyon sa Presidente sa pagpangita’g pamaagi aron nga sa kaulahian makab-ot ra sa nasud ang hingpit nga kasulbaran niini.

Sumala sa gobernador nga niadtong Abril 13 apil siya sa daghang Local Chief Executives nga miapil sa Mindanao Power Summit, ug iyang tuyo niini mao ang  pagpaminaw sa mga mahinungdanong pamahayag sa Presidente tumong kasulbaran sa nasinatiang problema sa supply sa kuryente sa tibuok Mindanao nga maoy hinungdan sa nahitabong Rotating Power Blackouts sa nanglabayng mga bulan.

Matud sa gobernador nga nalipay gyod siya sa pamahayag sa presidente labi na sa iyang saad sa katawhan nga siya maningkamot nga sa dili pa matapos ang iyang termino sa 2016 mawala na sa huna-huna sa mga Mindanaoan ang problema sa supply sa kuryente.

Gani tungod sa kaugalingong inisyatibo sa pangulo nakasugod na karon pagbayad ang nasud sa  dakong utang sa NAPOCOR diin, ang dul-an  P1.3 trillon pesos nga utang niini miabot na lang karon sa P982 bilyones tungod kay usa kini sa mga nag-unang  problema sa nasud nga labing gitutokan sa iyang administrasyon.

Gipahibalo usab sa presidente atol sa bag-o nahumang Mindanao Power Summit  nga siya milihok aron mapalambo ang serbisyo sa paghatag ug igong supply sa kuryente pinaagi sa paggahin ug P2.6 bilyones pesos nga maoy gamiton alang sa Large Scale Rehabilitation sa Agus 6, ug sa laing P7.24 bilyones pesos alang sa pag rehab sa river basin.

Sa laing bahin, bisan gisupak sa kadaghanan  ang larawng pag privatize sa Agus ug Pulangi Hydropower Electric Plants, apan matud sa gobernador nga malaumon gihapon siya nga makab-ot ra sa kaulahian ang pagsinabtanay labi na nga namahayag ang   presidente sa planong pag-review sa Electric Power Industry Reform Act (EPIRA) Law. (Gilbert M. Cabahug, ids-comval)

No comments:

Post a Comment