P53.5M Road Concreting Project sa Compostela padayon nga gitrabaho

Compostela Valley Province – Padayon karon nga gitrabaho ang mokabat P53.5 Milyones nga PAMANA-DA Road Concreting Project diha sa lungsod sa Compostela, ug base sa pinakaulahing Report nga gipagula sa Provincial Engineers Office (PEO) sa pagpanguna ni PEO Chief Engr. Rhoderick Digamon nga naa na sa 35% ang Physical Accomplishment sa maong “PAMANA-DA Road Concreting Project” nga mao ang pagsemento sa NRJ Compostela-Sitio Bongkilaton Farm to Market Road(FMR) diha sa Brgy. Ngan sa gilay-ong 2.92 ka kilometro.

Si PPDO Chief Mr. Romeo Celeste nagsulti nga gigamit sa pagsemento niining karsadaha ang P48.5 Milyones nga gitunol ni Pangulong Benigno S. Aquino III pinaagi sa opisina sa Department of Agriculture(D.A.), ug ang P5 Milyones counterpat sa probinsiya nga gigahin ni Gov. Uy nga maoy unod sa gihimong  kasabotan(MOA) tali sa  PLGU Comval ug sa D.A. nga naaprobahan  sa Comval SP sa pagpanguna nila ni Vice Gov. Manuel “Way Kurat” Zamora ug Senior Board Member Tyron Uy niadtong Agusto 20,2014.

Nahitabo ang pag-aproba human gipaboran pinaagi sa unanimous votes sa tanang SP Members nga mitambong sa ilang 54^th Regular Session nga gipanguluhan sa Presiding Protempore niadtong adlawa nga si Board Member Neri Barte ang duha ka mga resolution nga giduso nila SP Members Agusto Blanco Jr., Joseph Jaoud, Paul Galicia, ug Macario Humol alang sa laing P53.5 Milyones nga Road Concreting Project sa lungsod.

 Unang giaprobahan ang “Resolution to  Adopt” sa gihimong kasabotan kon Draft MOA  tali sa PLGU-Comval ug sa D. A. pinaagi sa Department of Agriculture Regional Office XI, ug ang ikaduha mao ang paghatag ug katungod kang Gov. Arturo “Chiongkee Uy” aron pirmahan ang gihimong kasabotan.

Apil sa mga miboto pabor sila si SP Members Atty. Ruwell Peter Gozaga, Ramil Gentugaya, Moran Takasan, Raul Timogtimog, Paul Galicia, Joesph Jaoud, Macario HUmol  ug Augusto Blanco Jr.nga maoy movant sa duha ka mga resolution. (Gilbert Cabahug/IDS Comval)