Gobyerno, nakatutok sa pagimbestiga sa pekeng bugas

Tulo ka ahensya sa gobyerno ang nakatutok karon aron imbestigahan ang giingong mga pekeng bugas nga nakasulod sa

nasud ug gibaligya na sa kamerkadohan.

Matud pa ni Presidential Communications Operations Office (PCOO) Kalihim Herminio Coloma Jr., gipa-­beripika na nila kun ang mga pekeng bugas kauban sa gi-angkat sa National Food Authority (NFA).

Gitumbok ni Coloma nga adunay obligasyon ang gobyerno nga atimanon ang kahimsog sa matag lumulupyo mao nga gihimo nila ang lakang nga pa-imbestigahan ang giingong pagkatap sa pekeng bugas.

Nanawagan si Coloma sa publiko nga mag-amping gayud sa pagpalit ug bugas ug mopalit  lamang gikan sa mga accredited ug kasaligan nga namaligya niini ug adto lamang sa mga  authorized rice dealers o mga tindahan og bugas nga adunay pagtugot sa NFA ug mga awtoridad.

Gikatahong gikan sa China ang mga pekeng bugas bisan ang Pilipinas nag-angkat lamang og bugas sa Vietnam ug Thailand. (PIA/etf)