16,209 pasyenteng Comvaleño nakabenepisyo sa libreng Health Outreach sa Comval

Compostela Valley Province – Unang Semester pa lang (Enero-Hunyo) sa 2015, miabot na sa 16,209 mga pasyenteng Comvaleño ang nakabenepisyo sa lain-laing mga serbisyo sa panglawas nga libreng gitunol sa mga mananambal sa Provincial Health Office atol sa nagsunod-sunod nga health outreach nga kabahin sa   Preventive Aspect sa Health Services Delivery nga padayong giimplementar sa liderato sa probinsiya sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, Senior Board Member Tyron Uy, ug SP Members.

Ang pinakaulahing Report sa Provincial Health Office sa pagpanguna ni PHO Chief Dr. Renato Basañes nagtug-an nga sa unang semester (Enero-Hunyo 20) sa tuig 2015 lang aduna nay 8,479 mga pasyente nga nakabenepisyo sa libreng consultation and medication, 3,050 sa libreng tuli, 77 sa libreng opera (minor surgery), ug 4,603 sa libreng pagpang-ibot sa ngipon.

Libre ang konsultasyon, libre ang laboratory services, ug dunay libreng mga tambal ug libreng Multi-vitamins nga gipanghatag sa tanang miapil sa kada  adlawng Health Outreach nga libreng gitunol sa probinsiya  pinaagi sa Hospital on Wheels (HOW) nga sa matag karon ug unya nagbalhin-balhin sa mga kabaranggayan diha sa onse ka mga lungsod.

Si PHO Chief Dr. Renato Basañes nagsulti nga sa pagtunol sa libreng mga serbisyo sa panglawas gipaningkamotan karon sa liderato sa probinsiya nga masulod sa nagpadayong Health Services Delivery kadtong mga katawhan nga diha nagpuyo sa lugar nga giilang Geographically Isolated and Depressed Area(GIDA). Partners sa probinsiya niini ang Department of Health(DOH) pinaagi sa DOH Regional Office XI ug ang Municipal LGUs. (Gilbert Cabahug/IDS Comval)