Mga ‘obese’ ug ‘overweight’ nga Pinoy, nagkadaghan

Sa pinakaulahing survey nga gipahigayon sa Food and Nutrition Research Institute sa Department of Science and Technology (FNRI-DOST), natino nga nagkadaghan ang mga ‘obese’ ug ‘overweight’ nga Pilipino nga nag-edad 20 anyos pataas.

Ang datos nga nahipos base sa body mass index (BMI), usa  ka basehang gikan sa World Health Organization (WHO).

Matud pa sa maong survey sa FNRI-DOST, ang mga tambok ug sobra sa timbang mas daghan sa mga may edad 40 anyos hangtud 59, ug mas daghan ang tambok nga kababayen-an kun itandi sa mga kalalakin-an.

Ang 3 ka rehiyon nga adunay taas og gidaghanon sa mga tambok ug sobra sa timbang nga mga bata nga may edad 5 anyos paubos mao ang Region III (Central Luzon), Region IV-A CALABARZON ug Cordillera Administrative Region (CAR).

Matud pa sa FNRI, ang dili pagkaon og sakto, kakulang sa ehersisyo, pag-inom og ilimnong makahubog ug panigarilyo ang mga behavioral risk factors nga mahimong mabag-o aron  malikayan ang pagtambok, pagbaton og alta-presyon, sakit sa baga, pagsaka sa asukal sa dugo o dili kaha sakit sa kasingkasing.

Ang mga mosunod ang pipila sa mga tambag sa FNR-DOST aron malikayan ang mga sakit nga dala sa katambok ug sobrang timbang.

Una ang pagkaon og balanseng pagkaon, sa saktong gidaghanon ug matang. Ang Daily Nutritional Guide Pyramid naghulagway sa saktong matang ug gidaghanong pagkaon nga angay kaunon sa adlaw-adlaw.

Ang gulay ug prutas kakuhaan og bitamina ug mineral aron mahimong maayo ang atong panglawas. Abunda kini sa mga lanot o fiber aron mahimong maayo ang dagan sa pagkaon sa atong kolon.

Ang humay, pan ug mga lagotmon ang nag-unang pagkaon nga makahatag kanato og enerhiya.

Batasanon usab ang pag-inom og 8 ka basong tubig o labaw pa niini sa adlaw-adlaw aron mahimong maayo ang dagan sa mga sustansya sa lawas ug aron dili usab ma-dehydrate o makasinati og grabeng pagkauhaw. (PIA)