Monday, August 18, 2014

Taga-ComVal daug sa 2014 National Invention Contest

by Gilbert M. Cabahug

COMPOSTELA VALLEY PROVINCE-----Ang Team sa mga estudyante sa Nabunturan National Comprehensive High School (NNCHS)  sa ComVal nga sila Jessica Eve Ardepuela, Earl Jann Lanaja, Vallerie Glorianne Duterte, ug Gemmila Sofia Alonsabe uban ang ilang Coach nga si Rowena Y. Pontillo maoy nanghawod sa 2014 National Invention Contest, ug ilang  Winning Entry niini ang ilang research sa “ Noncyanidation” nga pamaagi sa pag-retrieve sa “Valuable Metals” pinaagi sa Tubli ( Derris Eliptica) Roots Extract nga gigamit sa gihimong “Biooxidation”.

Ang ilang entry maoy isa sa nadeklarang National Winner sa mga hurado sa “Outstanding Student Creative Research (Sibol Award)”- usa sa unom ka mga kategorya sa bag-o nahumang 2014 National Invention Contest and Exhibits (NICE) nga gipasiugdahan sa kauluhan pinaagi sa Technology Application and Promotion Institute (TAPI) sa Department of Science and Technology (DOST) didto sa SMX Convention Center, Mall of Asia, Pasay City niadtong Hulyo 20, 2014.

Ang unom ka mga kategorya sa bag-o nahumang Invention Contest naglangkob sa Outstanding Invention (Tuklas Award), Outstanding Utility Model, Outstanding Industrial Design, Outstanding Creative Research (Likha Award), ug Outstanding Student Creative Research (Sibol Award) sa High School ug College nga maoy ilang nadag-an.

Unang naila ang grupo human nga ang ilang winning entry naapil sa 55 nga napilian  human ang regional elimination round gikan sa 831 gidaghanon sa mga entries sa tibuok nasud nga misalmot atol sa Regional Invention Contest and Exhibits (RICE) nga malampusong gihimo sa milabay’ng tuig.

Gikan sa napiling 55 niini ang 16 ka mga entries nga mi-qualify sa final elimination sa kategoryang “Outstanding Student Creative Research (Sibol Award) for High School and College” nga diin maoy isa sa gideklarang National Winner karong tuiga ang Winning Entry sa mga taga-ComVal ug sila apil nga mosabak sa International Inventions Contest and Exhibition isip representante sa nasud Pilipinas.  (gilbert m. cabahug, ids-comval)

No comments:

Post a Comment