Friday, August 29, 2014

P77M Road Concreting Project sa Monkayo giaprobahan sa ComVal SP

by Gilbert M. Cabahug

COMPOSTELA VALLEY PROVINCE-----Sugdan na sa moabot nga adlaw ang pagtrabaho sa P77 Milyones nga Road Concreting Project sa lungsod sa Monkayo, kini human naaprobahan sa Sangguniang Panlalawigan (SP) sa pagpanguna nila ni Vice Gov. Manuel “Way Kurat” Zamora ug Senior Board Member Tyron Uy ang gilutong kasabotan (MOA) tali sa PLGU Comval ug sa Department of Agriculture (DA) aron sementuhon ang usa ka road section gikan “Brgy. Union paingon sa Brgy. Upper Ulip sa lungsod gamit ang nahisgutang pundo.

Ang pag-aproba nahitabo niadtong Agusto 20, 2014 human gipaboran pinaagi sa unanimous votes sa tanang SP Members nga mitambong sa ilang 54th Regular Session nga gipanguluhan sa Presiding Protempore niadtong adlawa nga si Board Member Neri Barte ang duha ka mga resolutions nga giduso nila ni SP Members Agusto Blanco, Jr., Ramil Gentugaya, Joseph Jaoud, ug Paul Galicia alang sa P77 Milyones nga Road Concreting sa “Brgy. Union-Brgy. Upper Ulip FMR Section sa diha sa Monkayo.

Gisulti mismo ni PPDO Chief Mr. Romeo Celeste nga moabot sa 5.18 ka kilometro ang gilay-on sa karsada nga sementuhon, ug maoy gamiton sa pagsemento niining karsadaha ang P69 milyones nga gitunol ni Pangulong Benigno S. Aquino III pinaagi sa opisina sa Department of Agriculture(D.A.) ug ang P7.2 Milyones counterpart sa probinsiya nga gigahin ni Gov. Arturo “Chiongkee” Uy.
Unang giaprobahan ang “Resolution to  Adopt” sa gilutong kasabotan kon Draft MOA  tali sa PLGU-Comval ug sa DA pinaagi sa Department of Agriculture Regional Office XI alang sa P77 Milyones nga Road Concreting Project sa Monkayo, ug ang ikaduha mao ang paghatag ug katungod kang Gov. Uy nga maoy mopirma sa gilutong kasabotan.  Sama sa nahauna, kini giaprobahan gihapon pinaagi sa unanimous votes nga gitunol sa tanang SP Members nga mitambong.

Apil sa mga miboto pabor sila si SP Members Atty. Ruwel Peter S. Gonzaga, Ramil Gentugaya, Moran Takasan, Raul Timogtimog, Paul Galicia, Joseph Jaoud, Macario Humol  ug Augusto Blanco, Jr. nga maoy movant sa duha ka mga resolutions.  (gilbert m. cabahug, ids-comval)

No comments:

Post a Comment