ComVal SP giaprobahan ang kapin P15 milyones nga San Isidro-DNAS Road Concreting Project sa DA

by Gilbert M. Cabahug

COMPOSTELA VALLEY PROVINCE-----Laing concrete road na sad ang gihatag karon diha sa lungsod sa Monkayo, ug kini nahitabo human naaprobahan sa ComVal SP ang  gihimong kasabotan (Draft MOA) alang sa pagsemento sa San Isidro-DNAS Farm-to-Market Road (FMR) niining lungsura gamit ang pundo nga mokabat P15,246,000.00.

Gisulti ni PPDO Chief Romeo Celeste- natudlong Team Leader sa Project Pre-implementation Team sa ComVal,  nga ang P13,860,000.00 maoy gigahin ni Pangulong Benigno S. Aquino III pinaagi sa Department of Agriculture (DA) ilalom sa “Support to Emergency and Livelihood Assistance Project– Phase II (SELAP 2)” alang sa tuig 2014. Samtang, ubos sa kasabotan, ang liderato sa Probinsiya mohatag ug P1,386,000.00 nga counterpart alang sa pagsemento sa kapin kun kulang 734 metros gitas-on sa San isidro-DNAS FMR. Apil na niini ang sementadong canal lane sa gitas-ong 170.25 metros ug ang pagbutang ug 36” diametrong imburnal para sa iyang drainage.

Ang pag-aprobar nahitabo human gipaboran sa tanang SP Members pinaagi sa unanimous votes, ang duha ka mga resolution nga giduso ni SP Member Ruwel Peter Gonzaga niadtong Agusto 6, 2014 atol sa ilang 52nd Regular Session nga gipanguluhan ni Vice Gov. Manuel “Way Kurat” Zamora diha sa SP Session Hall sa Kapitolyo.

Unang naaprobahan ang “Resolution to Adopt” sa Draft MOA tali sa probinsiya sa ComVal ug sa Department of Agriculture (DA) Regional Office XI alang sa pag semento sa San Isidro-DNAS FMR sa Monkayo gamit ang  kapin P15 milyones nga pundo sa DA ug sa probinsiya. Ikaduhang resolution mao ang paghatag ug katungod kang Gov. Arturo “Chiongkee” Uy aron pirmahan ang gilutong kasabotan. Mopirma usab niini si D.A. Region XI Director Remelyn Recoter alang sa Department of Agrculture.

Apil sa mga miboto pabor sa duha ka mga Resolutions sila SP Members Tyron Uy, Ramil Gentugaya, Cesar Richa, Raul Timogtimog, Moran Takasan, Macario Humol, Atty. Arvin Dexter Lupoz, Neri Barte, Joseph Jaoud, ug Augusto Blanco, Jr.  (gilbert m. cabahug, ids-comval)