Monday, August 18, 2014

COMELEC: Mga botante gimandoan pagpailalom sa Mandatory Biometrics Voter Registration

by Gilbert M. Cabahug

COMPOSTELA VALLEY PROVINCE-----Giawhag karon sa Commission on Election ang tanang mga botante nga wala pa makapailalom sa Mandatory Biometrics Voters Registration nga sila moadto sa opisina sa COMELEC alang sa Validation aron nga sila makaboto sa umaabot nga Election sa Mayo 9, 2016.

Gisulti mismo ni ComVal Election Supervisor Atty. Jennifer P. Ancla nga human napirmahan ni Presidente Benigno S. Aquino III ang Akta Republika (R.A.) 10367 niadtong Pebrero 15, 2014 gikinahanglan na gyud ang tanang mga botante nga mapailalom sa Mandatory Biometrics Voter Registration, ug ang bisan kinsa nga wala makapailalom niini dili makaboto sa moabot nga Election.

Si Atty. Ancla sa Provincial COMELEC Office mitambong sa 53rd  Regular Session sa ComVal SP niadtong Agusto 13, 2014 nga gidumala sa Presiding Protempore niadtong  adlawa nga si Senior Board Member Tyron Uy, ug matud pa niya  nga gisugdan sa COMELEC ang Enforcement sa “Mandatory Biometrics Voter Registration” niadto pang Mayo 6, 2014 pinaagi sa gihimong validation nga mao ang digital nga pamaagi sa pag-capture sa hulagway, pirma, ug finger print sa mga botante aron makompleto ang record nga gimando sa balaod ilalom sa R.A. 10367.

Matud pa usab niya nga pinaagi sa Resolution no. 9853 ang COMELEC nagtagal sa period of Filing of Applications sugod Mayo 6, 2014 hangtud Oktobre 31,2015, ug sulod  niining panahona ang tanang mga botante gimandoan nga moadto sa mga opisina sa COMELEC alang  sa registration, sa validation, sa Correction, transfer, ug change of name.

Additional ground for deactivation matud pa ang non-compliance sa Mandatory Biometrics Voter Registration, mao nga bisan ang karaan nang registered voter kinahanglan gyod nga moadto sa opisina sa COMELEC alang sa nagpadayong validation, ug ang dili makahimo niini hangtud sa Oktubre 31, 2015 dili gyod makaboto sa May 9, 2016 nga piniliay.

Aron sayon lang sa tanan ang paghimo niini ang opisina sa COMELEC diha sa mga  siyudad ug kalungsuran abli kanunay gikan Lunes hangtud Sabado ug bisan Holidays gikan alas 8:00 sa buntag hangtud alas 5:00 sa hapon aron sa pag-atiman sa tanang mga botante nga moadto alang sa maong katuyoan. (gilbert m. cabahug, ids-comval)

No comments:

Post a Comment