“Bayanihan Para Sa Karunungan” ipahigayon sa ComVal

by Grace Almedilla

COMPOSTELA VALLEY PROVINCE-----Ang probinsyal nga panggamhanan nangandam alang sa usa ka Partners’ Forum nga ipahigayon karong Nobyembe 29, 2013 sa Kapitolyo para sa programang Bayanihan Para sa Karunungan.

Imbitado ang mga lokal nga lideres, business executives, ug ubang mga guests, ang nasangpit nga kalihukan mugnaon alang sa pag-agni ug mga program partners sa Provincial Local Government Unit aron moayuda sa programa sa Department of Education (DepEd) sa paghatag ug de kalidad nga edukasyon ngadto sa mga kabataan pinaagi sa in-school reading interventions.

Samtang ang probinsya nagatukod ug classroom-buildings subay sa bayanihan nga pamaagi sa Gawad Kalinga, nakita usab ni Governor Arturo T. Uy kung unsa ka importante ang usa ka Reading Program alang sa mga kabataan diha sa sayong panuigon sa ilang pagtungha.

Kini usab susama nga nakita ni Senior Board Member Tyron L. Uy, ang Chairman sa  Committee on Education and Information Technology sa Sangguniang Panlalawigan kinsa miingon nga ang pagbasa mao ang sinugdanan sa pagkat-on.

Ang provincial government aduna nay kasamtangang mga programa kalabot sa reading improvement and comprehension para sa mga kabataang nagtungha.  Ang Compostela Valley Transforming Education Today kun COMET usa ka reading initiative nga diin ang partner sa probinsya niini ang Alcantara Foundation ubos sa ilang corporate social responsibility ug sa  nadungog na nga public-private-partnership sa probinsya.  Samtang ang Project ARTURO kun Accelerated Readers, Tomorrow’s Ultimate Response to Opportunities usa usab ka reading development program nga diin katambayayong sa provincial government ang DepEd.  Kini naga-focus ngadto sa pagtudlo sa mga kabataan aron makakat-on nga mobasa ug makasabot sa ilang gibasa kun reading with comprehension.  Kining maong programa suporta usab sa  provincial government ngadto sa nasyonal nga adbokasiya nga nag-ingon, “Every Child A Reader.” 

Ang “Bayanihan Para Sa Karunungan” usa kini sa pagkab-ot sa tumong sa paghimo sa mga nasangpit nga reading programs nga mamahimong parte sa kinatibuk-an ubos sa “Kalinga sa Kabataan” Program ni Governor Uy.  Kini maoy mamahimong dalan alang na usab niadtong mga manggihatagon nga mga partner-donors aron sila makaambit sa kalipay sa pagpanday ug maayong kaugmaon sa alang sa mga kabataang Comvalenyo.  (grace almedilla, ids-comval)