by Gilbert M. Cabahug
COMPOSTELA VALLEY PROVINCE-----Mas daghan nga Vaccine allocations gikan sa Center for Health Development (CHD) sa Department Health (DOH) ang pwede na karong ma-withdraw sa probinsiya, ug kini tungod sa dugang 15-units Ice Lined Vaccine Refrigerators nga gihatag sa USAID pinaagi sa Mindanao Health/ JHPIEGO kun John Hopkins Program International Education for Gynecological Obstetrics.
Maoy midawat niini atol sa gihimong Ceremonial Turnover diha sa Kapitolyo niadtong Oktubre 23 si Senior Board Member Tyron Uy- OIC Governor, gikan sa mga dakong opisyal sa USAID-JHPIEGO nga sila Ryan Rockwell, Christopher Mascia, Victor Dasilva, ug Carlos Santos. Sa pagdawat niini, iyang kauban si SP Member Paul Galicia, ug ang mga staff sa PHO nga sila Mr. Arvin Ablin ug Marilou Tuazon nga maoy naggiya sa miabot nga mga bisita.
Ilalom sa Preventive Aspect sa mas gipakusog nga Health Services Delivery ni Governor Arturo “Chiongkee” Uy sa Compostela Valley pinaagi sa Provincial Health Office (PHO) ang pagtunol ug libreng bakuna aron mapanalipdan ang kinabuhi sa mga katawhang Comvaleño batok sa lain-laing sakit nga grabe ka makalilisang.
Partner sa probinsiya niini ang DOH-CHD XI nga sa kada tuig mihatag sa probinsiya ug dugang pang mga bakuna alang sa giilang kuyaw ug grabe ka makalilisang nga mga sakit sa kalibutan sama sa Measles Vaccine, Oral Folio Vaccine, Tetanus Toxoid, Hepatitis B Vaccine, Rotavirus Vaccine, Pneumococcal Vaccine, Influeza Vaccine, ug Anti-Rabies Vaccine.
Mihatag sad sila sa probinsiya ug dugang libreng Mumps Measles Rubella (MMR) Vaccine; libreng PPD kon Plasma Protein Derivative alang sa sakit nga TB; ug libreng Pentavalent Vaccine nga panalipod sa mga sakit nga Diphteria, Pertusis, Tetanus, Hepatitis B, ug Haemophilus Influenza.
Tungod sa milabay’ng Bagyong Pablo mas gipadak-an sa DOH ang alokasyon sa ComVal sa gipanghatag nilang libreng bakuna kada tuig huinungdan nga nakulang ang daang mga butanganang vaccine refrigerators mao nga dili pwede kausahon pag-withdraw sa probinsiya ang available vaccines nga gitunol kada tuig sa DOH.
Sa iyang pagdawat niini gipaabot ni Tyron ngadto sa mga bisita ang iyang dakong pasalamat, ug matud pa niya nga human gayud sa bagyong Pablo naa gayud dayon sa probinsiya ang USAID aron pagtunol sa lain-laing klase sa tabang ngadto sa mga katawhan. Matud pa usab niya nga gikinahanglan gayud kaayo sa probinsiya ang gitunol nilang Vaccine Refrigerators tungod usa kini sa mga labing gikinahanglan sa probinsiya sa padayong health services delivery. (gilbert m. cabahug, ids-comval)
No comments:
Post a Comment