4th batch sa “Adopt-A-Child” community-based na

by Gilbert M. Cabahug

COMPOSTELA VALLEY PROVINCE-----Community-based na karon ang nagpadayong “Adopt-A- Child Program” ni Governor Arturo “Chiongkee” Uy, ug matud ni Provincial Administrator Virgilia S. Allones  nga naangkon sa laing hugna sa programa  ang dakong kalampusan tungod pinaagi niini naserbisyohan ang tibuok community.

Niadtong Agusto 14, 2013 gisugdan sa probinsiya ang 4th Batch sa “Adopt-A-Child Program” diha sa Brgy. Katipunan, New Bataan ug maoy nangulo si Governor Uy sa Program Launching   nga gilangkoban sa usa ka hamubong programa; sa pagpirmahay sa Memorandum of Understanding(MOU); ug sa pagtunol ug libreng serbisyo sa panglawas pinaagi sa usa ka adlaw’ng Medical Outreach.

                                                                                                

Ilalom niini adunay laing 31 ka mga batang malnourished nga nakatagamtam sa dakong tabang nga gihatag kanila sa mga empleyado sa Kapitolyo. Kining mga bataa pulos taga New Bataan nga diin ang 12 kanila diha nagpuyo sa Brgy. Andap;  laing 12 sa Brgy. Katipunan; ug ang pito gikan sa ubang mga Barangay nga hangtud karon anaa pa gihapon nagpasilong sa “Tent City” tungod totally damaged sa Bagyong Pablo ang ilang mga balay.

Pinaagi niining programaha,  ang mga empleyado sa Kapitolyo gi-grupo base sa ilang tagsa-tagsa ka opisina ug nagpili ug usa ka batang severely underweight nga maoy ilang ginahatagan ug talagsaong klase sa pag-amoma sulod sa 120 ka adlaw.  Sila nag-amotay sa kada semana, ug ang natigom ilang gipalit sa mga pagkaong masustansiya ug puno sa bitamina nga ilang gihatud ngadto sa mga ginikanan aron nga sa kada adlaw ipakaon sa bata nga ilang adopted.

Sa paghimong community-based sa maong programa, adunay daghang mga kaayohan nga gidugang ang probinsiya niini sama sa cooking demo diha sa community; sa pagpanghatag ug libreng vitamins;  responsible parenthood seminar;  libreng medical check-up; ug libreng training sa vegetable production, Fertilizer Production, ug Vermi Culture nga gitudlo mismo ni Vice Gov. Manuel “Way Kurat” Zamora.

Gisulti ni Provincial Administrator Allones nga aduna  kini  mas maayong resulta  labi na nga daghan ang miapil sa usa ka adlaw’ng Brgy. Family Development Program Seminar nga miabot ug 70 ka mga magtiayon.  Matud pa usab niya nga tungod very successful ang maong kalihukan maoy sunod himoon ang pagpahigayon ug Kasalan ng Bayan nga dumalahon gihapon sa probinsiya.  (gilbert m. cabahug, ids-comval)