Sa ComVal: 236 Brgy. Implementers nakaapil sa Good Nutrition Promotion Training

by Gilbert M. Cabahug

COMPOSTELA VALLEY PROVINCE-----Miabot na karon sa 236 Barangay Implementers nga gilangkoban sa Barangay Nutrition Scholars (BNS), Barangay Health Workers (BHWs), Council of Women Leaders, ug Parent Leaders diha sa mga kabaranggayan ang nakakumpleto sa usa ka adlaw’ng training sa “Good Nutrition Promotion” nga libreng gitunol sa probinsiya pinaagi sa Provincial Nutrition Council nga gipanguluhan ni Provincial Nutrition Council Chair Governor Arturo “Chiongkee” Uy.

Duha ka adlaw ang gitunol nga libreng training diha sa ComVal Hotel sa Nabunturan, ug tumong niini nga kadtong mga miapil masangkapan sa dugang kahibalo sa pagpromotar sa Good Nutrition nga dako’g ikatabang sa mga tahas ug buluhaton nga gisalig kanila sa probinsiya diha sa padayong pagtunol ug serbisyo sa panglawas ngadto sa mga katawhan diha sa mga kabaranggayan.

Matud ni Provincial Nutrition Coordinator Nena Mirafuentes nga panahon training, ang mga partisipante gitudloan sa mga angayang buhaton aron maagni ug madasig sa exclusive breast feeding kadtong mga nanay nga dunay anak gikan 0-6 ka bulan pa ang edad.

Samtang gitudlo usab kanila ang mga pamaagi sa pagdugang ug complementary foods nga puno sa Vitamin A, Iron, ug energy giving foods sa gisugdang breast feeding aron maoy ilang itudlo sa mga nanay nga dunay anak 6 mos.-2years.

120 ang miapil sa 1st 4 batches gikan sa 21 ka mga Barangays sa Nabunturan ug 8 ka mga Brgys. sa New Bataan niadtong Oktubre 7-11.  Samtang miabot sad ngadto sa 116 ang miapil sa 2nd 4 batches gikan sa 15 ka mga barangays sa Maco; 9 ka mga barangays sa Pantukan; ug 6 ka mga barangays sa Mawab.

Sa iyang paghatag ug inspiring message, gipaabot ni Committee on Health and Social Services Chair Senior Board Member Tyron Uy, ang iyang dakong pasalamat sa ilang pag-apil nga maoy timaan sa ilang dakong kadasig nga molambo ang ilang kahibalo sa hustong Nutrition.

Ang ilang mga nakat-onan makatabang ug dako matud pa, nga mapaabot sa probinsya diha sa community labi na ngadto sa mga nanay panahon sa dumalahon nilang “Mothers’ Class” ang tukmang kahibalo sa hustong Nutrition ingon nga usa sa mga mahinungdanong tumong sa Millenium Development Goals (MDG) sa nasud.  (gilbert m. cabahug, ids-comval)