by Gilbert M. Cabahug
COMPOSTELA VALLEY PROVINCE-----Alang sa mga mangungumang Comvaleño nga gusto magtanom ug Oil Plam sa ilang yuta dili na problema ang finacing tungod ang Land Bank of the Philippines (LBP) andam motabang kanila pinaagi sa gitanyag nilang Production Loan Package nga P110,000.00 sa kada ektarya.
Usa sa mga Account Officers sa sa LBP nga si Mr. Vencenso P. Dimol nagsulti panahon sa malampusong “Cooperative Business Financing Cum Orientation Forum” diha sa Comval Capitol niadtong OktUbre 23, nga aron matabangan ang mga katawhang Comvaleño nga molambo ang ilang panginabuhi ang LBP adunay lain-laing Loan Packages nga itunol pinaagi sa mga kooperatiba ug usa niini ang para sa Oil Palm Production.
Matud pa niya nga nakita sa LBP Management ang pagka-viable sa Oil Palm Production ug kini maoy nag-unang rason nga ang LBP nagtanyag ug Production Loan nga P110,000.00 ang kada ektarya sa gamay kaayong interest rate ngadto sa mga mangunguma nga interesado nga magtanom niini. Duna kiniy 5 ka tuig nga grace period sa pagbayad mao nga didto na nila kini sugdan pagbayad sa ikaunom ka tuig.
Ubos sa pagtinabangay sa Provincial Cooperative Union-Compostela Valley (PCU-ComVal) ug sa Provincial Cooperative Development Council (PCDC) nga gipanguluhan ni PCDC Chair Governor Arturo “Chiongkee” Uy, ang probinsiya sa Compostela Valley nagselebrar usab karon sa Cooperative Month sa bulan sa Oktubre.
Apan gitin-aw ni PCU-ComVal Chair Mr. Eliseo Tan atol sa iyang Welcome Message nga maoy focus sa “Cooperative Month Celebration” karong tuiga ang pagpalambo sa economic activity, ug kabahin niini ang gihimong “Business Financing Orientation Cum Forum” sa mga coop leaders nga dakog ikatabang aron moasenso ang mga katawhan nga maoy tuyo sa mas gipakusog nga Cooperative Development Program ni Governor Uy sa ComVal. (gilbert m. cabahug, ids-comval)
No comments:
Post a Comment