Livelihood trainings gikalipay sa kababayen-an sa Talikud

Davao del Norte Provincial Information Office

Madasigung migama sa ilang mga produkto ang mga miyembro sa people’s organizations nga gi-organisa ilawom sa Ugmad Komunidad program ni Gob. Rodolfo P. del Rosario, didto sa duha ka mga barangay sa isla sa Talikud, Island Garden City of Samal, niadtong Hunyo 21-22, 2012.

Mga fashion accessories gamit ang poka shells ang nahimong sentro sa trainings didto sa Brgy. Linusutan nga gitambungan sa kapin 20 ka mga miyembro sa LACAD kon Linusutan Achievers Association for Development.

Si Brgy. Capt. Eugene  Muaña, Jr. sa Brgy. Linusutan, nagpadayag sa iyang pasalamat sa programa ni Gob. del Rosario .

“Kon kini magmalampuson, kining mga poka shells nga abunda dinhi sa among baybayon, mahimo na unyang mapuslanon.  Pwede na unya namo kini ibaligya sa mga resort nga daghan kaayo dinhi sa among isla,” matud ni Kapitan Muaña.

Samtang sa kasikbit nga barangay, way pu-as ang pagtuon usab sa paggam og mga produkto gamit ang coco midrib sa mga miyembro sa UDA, kon Ugmad Dadatan Association. Si Kapitana Charito Tacsanan, nga mao usab ang Presidente sa maong kapunungan nalipay sa pag abot sa maong skills training sa ilang lugar.

“Kining plato ginama sa coco midrib, dako kaayong tabang dinhi namo ilabi na kay umaabot na ang among Araw ng Dadatan celebration. Nanghinaut kami nga tabangan pa kami sa probinsiya aron ma-improve pa ang kalidad niini,” sulti ni Kapitana Tacsanan.

Ang laing duha ka mga barangay sa Talikud nga mao ang Cogon og Sta. Cruz ang karon naka linya na usab alang sa laing livelihood trainings.

Gikatakdang mulunsad usab og trainings ang Ugmad Komunidad sa lain pang mga barangay sa mainland province sa sunod nga mga bulan.#