Comval gisaulog ang National Arbour Day, empleyado nagtanom ug 4,000 kahoy

Aron makab-ot ang “20 Million 15 Trees” ilalom sa Provincial Greening Program nga gipatuman ni Gov. Arturo “Chiongkee” Uy sa tibuok probinsiya sa Compostela Valley, gisaulug sa tibuok probinsiya ang National Arbour Day ug atol niini gihimu sa ikaduhang higayon sa mga kabaranggayan sa 11 ka mga lungsod ang Simutaneous Tree Planting.

Manguna sa maong kalihokan ang mga empleyado sa kapitolyo, mga national line aegencies ug ilalom sa pagpanguna ni Gov. Arturo “Chiongkee” Uy ilang natanum ang mokabat 4,000 ka punoan sa kahoy sa Lamdag Agro-Eco-Tourism Complex sa Brgy. Pasian, Monkayo niadtong Hunyo 25,2012 - ang adlaw nga saulogon sa tibuok  Pilipinas ang National Arbour Day.

Kauban sa mga empleyado sa kapitolyo sa pagpananom ug kahoy ang mga empelyado ug mga dagkong opisyal sa National Line Agencies nga na-assign sa probinsiya sama sa DepEd, DENR, NCIP, DPWH, TESDA, NIA, DILG, LTO, NFA, COMELEC, ug uban pa.

Kon ipunon ang tanang kahoy nga natanom sa tibuok probinsiya sa unang pagsaulog sa National Arbour Day (June25) kini miabot ngadto sa kapin 107,000 ka punoan. Apan sa  tibuok tuig sa 2011 miabot gyod sa 3,444,448 ka punoan ang gidaghanon sa kahoy nga natanom sa mga katawhang Comvaleño. (gilbert cabahug/ids comval)