Friday, June 22, 2012

Garbong lungsoranon giawit sa Himig Turismo


TAGUM CITY, Davao del Norte, June 22 – Nagkanindot ang pag-awit sa katahum, ilhanan ug garbo sa kalungsuran sa padayong pag-arangkada sa jingle contest Himig Turismo DavNor sa mga lungsod sa Probinsya sa Davao del Norte.

Bibo ang mga kanta  sa upat ka mga banda nga misalmot sa gipahigayon nga Himig contest sa Lungsod sa Kapalong, isip kabahin sa kasaulogan sa ika-45 nga Araw ng Davao del Norte.

Nasungkit sa Big Ribbon Band ang kadauggan pinaagi sa awit nga miagni sa katawhan sa pagpasigarbo sa ilang matahum nga dapit, samtang ga-alima sa tradisyon ug kahinguhaan niini.

Malaumon si Mayor Edgardo Timbol nga modaug ang maong banda sa umaabot nga grand finals sa Kapitolyo sa anniversary night sa Hulyo 1, 2012.

Ang champion makadawat ug cash prize nga P10,000, samtang ang second ug third placers mobitbit ug  P7,000 ug P5,000 nga premyo.

Samot nga nalingaw ang katawhan sa Kapalong pinaagi sa concert nga gi-sponsor sa San Miguel Beer.

“Atong gidala ang kalihokan sa 45th Araw ng Davao del Norte sa kalungsuran aron mabati sa atong katawhan nga kaparte jud sila sa atong selebrasyon,” Sulti ni OIC-Provincial Administrator Normal Lumain. (PIO-DavNor/Noel Baguio)

No comments:

Post a Comment