Rice ug Corn Farmers sa ComVal lipay sa nagpadayong libreng daro sa “Task Force Alayon”

COMPOSTELA VALLEY PROVINCE-----Dugang sa padayong pagpang apod-apod sa mga hinabang pagkaon ug uban pang relief goods, ang probinsiya padayon usab nga mitunol ngadto sa Pablo Victims sa lain-laing klase sa Agricultural Inteventions nga gipatuman ni Governor Arturo “Chiongkee” Uy  aron nga pinaagi niini mamahimong mas dali ang recovery sa mga katawhan gikan sa grabeng kawad-on nga nasinati tungod sa milabay’ng bagyo.

Usa sa mga Agricultural Interventions nga nakahatag ug dakong kalipay sa mga katawhan mao ang pagsuporta sa farm mechanization sa mga mangunguma, ug alang niadtong farmers nga walay kaugalingong makinarya kini gipalapdan sa probinsiya ngadto sa pagtunol kanila sa serbisyo nga libreng pagpangdaro sa ilang kaumahan pinaagi sa “Task Force Alayon” sa Department of Agriculture (DA).

Diha sa mga lungsod sa Compostela, sa Monkayo, ug sa New Bataan ang katabang kun kaalayon sa probinsiya sa pagtunol niini ang  D.A. Region 12 nga nagpadala ug walo ka farm tractors;  ang D.A. Region 10 nga nagpadala sad ug 2 ka Farm Tractors; ug ang D.A. Region XI nga mitabang usab sa probinsiya sa gikinahanglang oil, fuel, and lubricants.

Sa ilang pinakaulahing report, ang D.A. Region XII nagsulti atol sa gihimo nilang exit conference nga ang ilang walo ka farm tractors nga gipadala sa ComVal nakahuman pagdaro sa mokabat 607.785 ka ektaryang maisan ug humayan, ug nakabenepisyo niini ang 218 ka mga mangunguma diha sa mga lungsod sa Monkayo, sa New Bataan, ug sa Compostela. Kapin sad sa 49 ka ektaryang maisan ang nahuman pagdaro sa tractors nga gipadala sa D.A.Region 10.

Didto sa Laak maoy mitunol sa serbisyo nga libreng daro ang probinsiya, ug matud ni PAGRO Chief Dr. Rolando Simene nga ang tractor nga gipadala sa probinsiya nakahuman na pagdaro sa  50 ka ektaryang maisan.

Samtang libreng krudo ug gasolina usab maoy gi-provide sa probinsiya ug sa D.A. ngadto sa mga mangunguma nga dunay kaugalingong floating tiller ug farm tractor. Pinaagi nining klaseha sa tabang, nahuman sad pagdaro ang lain pang kapin 752 ka ektaryang maisan ug humayan diha sa  mga lungsod sa Compostela, sa Monkayo, sa New Bataan, ug sa Montevista. (Gilbert M. Cabahug, ids-comval)