COMPOSTELA VALLEY PROVINCE-----Giklaro karon ni Governor Arturo “Chiongkee” Uy nga maoy pagtutukan sa iyang administrasyon sa dugang tulo ka tuig pa niyang paglingkod sulod sa ikatulong termino ang gisugdang mga paningkamot sa Rebuilding. Kini aron nga matagamtaman sa mga katawhan ang mas maayo pa nilang kahimtang sa wala pa maigo sa Supertyphoon Pablo ang tibuok probinsiya sa Compostela Valley.
Sa pagsaulog sa 15th Founding Anniversary ug 6th Bulawan Festival nga malampusong gihimo diha sa Nabunturan National Comprehensive High School niadtong Marso 8, iyang gipahibalo sa halos tanang mga lideres ug mga katawhan nga gisumiter na sa probinsiya ngadto sa buhatan ni Presidente Benigno Aquino III ang “Blue Print of Recovery sa ComVal panahon sa National Task Force Pablo Meeting didto sa kauluhan.
Kabahin niini ang recommended recovery and reconstruction needs sa probinsiya nga mokabat sa 16.749 Bilyones Pesos. Kun kini ihatag na sa pangulo, ang kapin 7.405 bilyones pesos gikan niini maoy gamiton sa probinsiya pagtukod ug mga balay alang sa mga biktima sa bagyong Pablo nga wa na gayoy kapuy-an tungod totally damaged ang ilang mga balay.
Malaumon ang gobernador nga ang gipangayong kapin 7.4 Bilyones Pesos nga pundo alang sa Resettlement Program sa mga katawhan, pagaaprobahan gayud ni Pangulong Aquino tungod dili gusto ang Pangulo nga ang mga katawhan mobalik sa daan nilang gipuy-an.
Apan iyang giklaro nga dunay obligasyon ang mga lideres ug ang mga katawhan niini nga mao ang paghatag ug counterpart sa lain-laing mga pamaagi sama sa pag-apil sa mga trabahoon panahon sa Construction. (Gilbert M. Cabahug, ids-comval)
No comments:
Post a Comment