Thursday, March 21, 2013

Gov. Uy gipanghatag sa dul-an 2,000 Pablo Victims ang mga sen nga gihatag ni Cong. Pacqiao sa Comval


COMPOSTELA VALLEY PROVINCE-----Gisugdan na ni Governor Arturo “Chiongkee” Uy  pagpanghatag ngadto sa mga katawhang biktima sa milabay’ng bagyong Pablo ang mga sen nga gihatan ni Cong. Manny Pacquiao.  Maoy unang nakabenepisyo niini ang mokabat 1,968 ka pamilyang nanag-iya sa partially damaged houses diha sa mga lungsod sa Compostela, Monkayo, Montevista,  New Bataan, ug sa Laak.

Maoy gitahasan ni Governor Uy sa pagpang apud-apod sa mga sen ni Cong. Pacquiao ang mga empleyado sa Kapitolyo nga sakop sa iyang gimugnang Shelter Cluster.  Ilang kauban sa pagpang apud-apod niini ang mga empleyado sa munisipyo nga misakop sa lugar nga gipuy-an niadtong gipanghatagan sa maong mga sen.

Matud ni Shelter Cluster Lead Arceli Timogtimog nga sugod niadtong Martes hangtud sa Biyernes ilang nahatagan  sa tag-unom ka plegong 10ft. corrugated gi sheets ni Cong. Pacqiao ang 1,968 ka pamilya, ug sulod sa usa ka semanang pag-release natunol sa probinsiya kanila ang 11,803 ka plegong sen.

Sa milabayng bulan miabot sa kapitolyo sa Compostela Valley ang saad nga hinabang ni Cong. Pacquiao sa mga biktima sa Supertyphoon Pablo, ug maoy sulti ni PGSO Chief Timogtimog  nga ilang nadawat ang daghang sen ug ang 1,800 ka palid nga plywood nga gihatud sa mga sinaligan sa ginaidolong boksidor.

Si Cong. Pacquaio maoy usa sa daghang local donors nga mitabang sa probinsya sa pag-atiman sa mga biktima sa bagyo, ug sa iyang pagbisita sa ComVal niadtong Disyembre 16, 2012, siya mitunol ug 3,000 ka putos nga assorted goods nga gipang apud-apod sad dayon ngadto sa mga biktima sa bagyong Pablo sa New Bataan.
Matud ni Gov. Uy nga nag-uban gayud sila ni Cong. Pacquiao sa pagpanghatag ug hinabang sa Typhoon Pablo Victims sa New Bataan, ug sa maong panahon iyang nasinati ang kamaloloy-on ug ang kabuotan ni Pacquiao. Gani human matud pa sa sa gihimo nilang Distribution sa Relief Goods, si Cong. Pacquiao misaad usab ug dugang pang mga hinabang nga itunol alang sa mga biktima sa bagyo sa Compostela Valley.  (Gilbert M. Cabahug, ids-comval)

No comments:

Post a Comment