COMPOSTELA VALLEY PROVINCE-----Kabahin sa gipalapdang Provincial Spiritual Development and Moral Recovery Program (PSD-MRP) ni Governor Arturo “Chiongkee” Uy sa Compostela Valley ang gihimong 1stProvincial Dawn Prayer diha sa Kapitolyo niadtong Sabado nga gisalmotan sa kapin kun kulang 3,500 pastors, church leaders, ug miyembro gikan sa lain-laing mga simbahan sa 11 ka mga lungsod sa probinsiya aron paghalad sa hiniusang mga pag-ampo, mga pasalamat, ug mga pagdayeg sa Labaw’ng Makagagahum tungod sa Iyang kaayo ug pagkamaloloy-on.
Matud ni Philippine Dawn Watch Founder Rev. Kim Kap Dong, nga daghang higayon diha sa Balaang Kasulatan nga ang Labaw’ng Makagagahom naghimog mga dagkong milagro panahon sa sayong kabuntagon (Ex. 14:27;Lk.24:1-3) mao nga angay nga kining taknaa hatagan ug dakong pagtagad sa mga katawhan pinaagi sa paghimog hinusang mga pag-ampo, mga pasalamat, ug mga pagdayeg.
Ang bag-o nahumang 1st Provincial Dawn Prayer gisugdan sa alas 4:00 sa kaadlawon ug maoy nangulo niini sila si Gov. Uy –PSD and Moral Recovery Council Chairman; ug si Board Member Paul Galicia. Kini gisugdan sa usa ka Opening Prayer ni Rev. Rufo Butt Jr., ug human sa iyang sa iyang pag-ampo ang mensahe sa Essence of Prayer gikan ni Rev. Kim Kap Dong sa Korea. Sunod sa iyang mensahe ang Intercessory Prayer gikan sa lain-laing mga lungsod, ug ang Thanksgiving Prayer ug mensahe ni Gov. Uy.
Gipasabot ni SP Member Galicia nga ang maong kalihokan usa usab ka Wake-up Call sa mga katawhan aron maangkon ang saad sa Dios nga gisulti sa 2 Cronicas 7:14 nga nag-ingon; “Kon ang katawhan nga akong tinawag modangop kanako sa dakong pagpaubos ug mobiya sa ilang mga sala, patalinghogan ko gayod sila ug pasayloon sa ilang mga sala ug ibalik ko ang kadagaya sa ilang nasud”. (Gilbert M. Cabahug, ids-comval)
No comments:
Post a Comment