COMPOSTELA VALLEY PROVINCE-----Gitun-an na karon sa Sangguniang Panlalawigan (SP) sa probinsya ang bag-ong Computer Program aron hingpit nang makab-ot ang gitinguhang paperless legislation. Ang hands-on niini ilang gisugdan panahon sa ilang 120th Regular Session.
Ug atol sa ilang 121st Regular Session gipadayon nila ang hands on gamit ang ilang tagsa-tagsa ka Laptop Computer. Samtang makita usab sa mga bisita ug sa mga katawhang mitambong diha sa wide screen ang mga butang nga ginahisgotan sa SP members panahon sa ilang Session.
Gi-install diha sa ilang tagsa-tagsa ka Laptop ang usa ka bag-ong Computer Program nga gi-develop ni Jomar Palma ug sa uban pang inhouse Programmers sa Information Technology and Communication Development Division (ITCDD) ilalom sa opisina ni Gov. Arturo “Chiongkee” Uy. Kining opisinaha ubos sa pagdumala ni ITCDD Chief Joyzel Odi.
Matud ni Library Archieves Division Chief Rene Dianito nga gi-develop sa opisina ni Gov. Uy ang usa ka Programa nga nagpalapad sa gamit sa Legislative Tracking System (LTS) nga gi-install sa Lexsys Technologies Incorporated.
Kun hingpit nang maimplementar ang gitinguhang paperless legislation gibana-bana ang kapin 300 ka papel nga madaginot sa kada opisina matag-semana - diha sa opisina ni Vice Governor Ramil L. Gentugaya, sa kada Board Member, ug sa SP Secretariat.
Giklaro usab ni Dianito nga tungod ang maong programa gi-install diha sa taga-tagsa ka laptop sa SP Member, mas mosaka gyod ang level sa ilang performance ability tungod pwede nilang himuon ang ilang trabaho bisan diha ra sila sa ilang balay, ug sa bisan asang dapit ug oras nga ilang gusto. Kay halos tanang impormasyon nga gusto nilang masayran labot sa ilang legislative function dali ra nilang makita pinaagi lang sa pag-browse niini diha sa ilang tagsa-tagsa ka laptop computer. (Gilbert M. Cabahug, ids-comval)
No comments:
Post a Comment