Gov.Uy hugtanong misuporta sa No Balance Billing (NBB) Policy sa Philhealth ni Pangulong Aquino

COMPOSTELA VALLEY PROVINCE-----Hugtanon karong gisuportahan ni Governor Arturo “Chiongkee” Uy ang No Balance Billing (NBB) Policy sa Philhealth nga gimando ni Presidente Benigno S. Aquino III, ug tungod niini giklaro ni PEEMO Administrative Officer Gary Alonsabe nga ang upat ka Provincial Hospitals sa ComVal dili na mangolekta ug bayad sa mga pasyente nga holder sa   Government Sponsored Philhealth Cards.

Gipasabot usab ni Alonsabe nga walay labot sa kapin P75 milyones nga income ang  gihatag nga discounts sa probinsiya ngadto sa indigent patients tungod daghan kanila wala na gipabayad sa ila untang bayronon sa mga hospitals kay ang probinsiya mao nay miabaga sa ilang mga bayronon.

Gawas sa pag-upgrade sa Hospital Services pinaagi sa pagpalambo sa Hospital Infra, Hospital Facilities, ug sa High Quality Services Delivery nga padayong gitunol sa mga health personnel diha sa 4 Provincial Hospitals, ang liderato sa probinsiya sa pagpanguna ni Gov. Uy naningkamot usab sa pagtabang sa kabus nga mga katawhang Comvaleño pinaagi sa pagtunol kanila sa libreng Philhealth Enrollment.

Maoy partner sa probinsiya niini ang national nga gobyerno pinaagi sa Department of Social Welfare & Development (DSWD) ug sa Department of Health (DOH), ug aron mas mapadak-an pa ang gikahatag kanila nga benepisyo sa gobyerno gimando usab ni Gov. Uy nga suportahan ang No Balance Billing  Policy sa Philhealth ni Pangulong Aquino.

Matud usab ni Alonsabe nga tungod sa hugtanong suporta ni Governor Uy sa NBB Policy sa presidente, kadtong mga pasyente nga na-admit sa bisan asang Provincial Hospital sa ComVal nga holder sa Government Sponsored  Philhealth Card dili na pabayron sa ilang excess nga bayronon kun duna man.  Kini tungod maoy motapada sa excess nilang bayronon ang probinsiya pinaagi sa Provincial Economic Enterprise Management Office (PEEMO) ilalom sa pagdumala ni Dr. John Edward Coloma. (Gilbert M. Cabahug, ids-comval)