NCIP Legal: Correction sa birth certificate gamay na lang ug magasto

Compostela Valley Province – Tungod sa R.A. 10172 gamay na lang karon ang magasto sa mga katawhan nga dunay topographical kon clerical error sa ilang birth certificate. Kini matud pa ni Atty. Jazel Joves diha sa kapitolyo panahon sa iyang pagtambong sa Provincial Tribal Council Regular Meeting nga gitabangan pagdumala nila  ni Datu Felipe Masambo-Provincial Tribal Council  Chairman, ug ni IP Sectoral Representative Board Member Augusto Blanco Jr.

Usa sa mga mahinungdanong gihisgotan panahon sa mokabat usa ka adlawng panagtapok sa mga Tribal Leaders sa onse ka mga lungsod sa probinsiya mao ang paghatag kanila ni SP Blanco sa Update sa nagpadayong Birth Late Registration sa mga lumad nga gigahina’g dakong pundo ni Gov. Arturo “Chiongkee” Uy karong tuiga.

Base sa report ni SP Member Blanco nga segun sa ilang gihimong census sa mga lumad sa probinsiya, adunay 21% pa lang kanila nga  dunay Birth Certificate, mao nga kining problemaha gitutokan usab sa liderato sa probisiya aron nga sila matabangan sa ilang birth certificate pinaagi sa nagpadayong Birth Late Registration.

Katabang sa probinsiya paggahin ug dakong pundo alang sa nagpadayong Birth Late Registration mao ang UNFPA. Apan dako sad kaayog natabang niini ang NCIP diha sa aspetong legal nga kabahin sa nagpadayong proseso sa Birth late Registration sa mga lumad.

Matud ni Atty. Joves nga ang iyang lamesa diha sa NCIP Provincial Office mihatag sa serbisyong legal sa mga lumad nga libre, ug dako niyang kalipay tungod napasayon ang mga komplikadong buluhaton sa proseso sa pagkuha ug record tungod sa mga kausaban ilalom sa bag-ong balaod.

Ilalom matud pa sa R.A. 10172 nga puwede na ang civil registrar mousab dayon sa mga sipyat sa Date of Birth ug sa Gender, ug wala na gikinahanglan ang judicial order kon mando  gikan sa korte.

Kahibaloan nga ilalom sa daang balaod nga mao ang R.A. 9048 gimando nga mahimong usbon deretso sa Civil Registrar bisan walay court order kon ang sipyat diha sa Birth Certificate first name ug nickname. Apan ilalom sa R.A. 10172 nga gipirmahan ni Pang. Aquino niadtong Agusto 15,2012 kini gipalapdan pinaagi sa paghatag ug pagtugot sa Civil Registrar nga mahimo nilang usbon diha-diha ang sipyat sa Birth Date kon petsa sa pagkatawo ug sa sex kon iyang gender nga dili na gikinahanglan ang mando sa korte. (gilbert cabahug/ids comval)