Ang probinsiya sa Compostela Valley padayon gihapong nagpakita sa iyang talagsaong hunat diha sa kaugdang ug kalig-on sa liderato ug sa pagkamaayo diha sa serbisyo publiko nga naila pinaagi sa nagtipun-og nga recognitions ug awards nga nadawat, ug sama sa gihimong pagpakyaw sa probinsiya ug mga kalungsuran sa National Sandugo awards sa kada-tuig gihakot sad nila ni Gov. Arturo “Chiongkee” Uy ug sa 11 ka Municipal Mayors ang CY 2011 Good House Keeping Awards nga gitunol ni Presidente Benigno S. Aquino III pinaagi sa Department of Interior and Local Government (DILG).
Timaan niini mao ang “TAPAT NA PALAKAD, BAYANG MUNLAD” Seal of Good House Keeping CY 2011 Award nga malipayong gitunol ni DILG Provincial Director Lborio Diana ngadto kang Gov. Uy niadtong Sept. 24, 2012 sa kapitolyo. Pinaagi niini, subling gipahibalo karon sa Malacañang nga hugtanong giiila sa pangulo ang gihimong mga paningkamot sa liderato aron nga magmapadayonon ang talagsaong hunat sa paspas nga paglawig ug paglambo sa probinsiya ilalom prinsipyong “Accountability and Transparency in Local Governance.”
Kauban sa gihatag nga award sa Seal of Good House Keeping mao ang Performance Challenge Fund (PCF) nga mokabat sa P3 milyones pesos nga kantidad sa proyekto. Samtang ang onse ka mga lungsod gipremyohan sad ug tag P1M nga kantidad sa proyekto nga PCF.
Sayo niini gipahibalo ni DILG Provincial Director Diana nga sa nakalabayng semana iyang gilibot ang onse ka mga lungsod alang sa ceremonial nga paghatag sa Municipal Mayors sa ilang tagsa-tagsa ka Seal of Good Housekeeping Award.
Aron maila sa Malacañang ang mga lungsod, mga siyudad, ug mga probinsiya nga takos sa maong pasidungog ang DILG nagmugna ug grupo sa evaluator nga gilangkoban sa mga personahe sa DILG kauban ang usa ka representante sa Civil Society Organization (CSO) nga maoy molibot matag-karon ug unya aron masayran ug maila kadtong mga LGUs nga takos hatagan sa talagsaong pasidungog. (gilbert cabahug/ids comval)
No comments:
Post a Comment