Friday, February 15, 2013

Pablo Victims sa New Bataan nalingaw sa padula nga gidumala sa probinsiya


 COMPOSTELA VALLEY, February 15 -Nalingaw ang mga katawhan ug mga kabataang biktima sa bagyong Pablo sa lungsod sa New Bataan niadtong adlaw’ng Sabado, Pebrero 9, panahon sa unang serye sa pagpahigayon ug padula nga gidumala sa probinsya.

Kauban sa kalampusan sa tibook adlaw nga sports event si kanhi Provincial Sports Coordinator Tyron Uy kinsa nalingaw pag-ayo ug mibati sa tumang kalipay sa nasaksihang dakong kabag-uhan sa palibot pinaagi sa gisugdang sports theraphy sa Provincial Sports Development Council ug sa Local Government Unit sa New Bataan didto sa Don Lorenzo Sarmiento, Sr. Sports Complex.
Mga kabataan nga nagpangidaron ug kinse anyos paubos ang gipaapil, ug pipila sa mga games nga ilang gidula mao ang Basketball, Volleyball, ug Football.
Ang Sports Theraphy maoy usa sa mga pamaagi sa Stress Debriefing nga gihimo sa probinsiya aron makabawi gikan sa traumatic experience ang mga biktima sa milabay’ng bagyo ug sa  uban pang klase sa mga problemang psycho-social nga ilang nasinati.

Maoy nag-introduce niini sa probinsiya si Tyron Uy nga sa pagkakaron maoy Provincial Sports Consultant. Tungod naaprobahan  sa Provincial Development Council.

Matud ni Provincial Sports Development Coordinator Francis Secuya, nga sa pagsugod pa lang sa dula ila dayong nakita ang kadasig ug kamalipayon sa mga mitan-aw ug sa mga miapil.

Gi-grupo ang mga kabataan ingon nga team base sa ilang Barangay ug Purok, ug ang kada team gihatagan ni Tyron ug bola aron nga bisan human na ang unang hugna sa padula, sila sa gihapon padayong malingaw panahon sa ilang practice kun himoong mga pagbansay. Dugang sa gipanghatag nga bola, ang libreng arroz caldo nga gidalit usab kanila sa probinsiya. (Gilbert M. Cabahug, ids-comval)   

No comments:

Post a Comment