Kongreso gitapos na ang pakisusi sa Mamasapano, sunod nga agenda mao ang BBL

Opisyal na nga gitapos sa ubos balay balauranan ang pakisusi niini sa nahitabaong madugoong engkwentro ngadto sa Mamasapano nga mipatay ug kapin 40 ka miyembro sa Philippine National Police (PNP).

Nahuman sa mga magbabalaod ang pag imbestigar sa maong isyu lagpas ala una sa kadlawaon niadtong Abril 15, Miyerkules.

Nagpahayag sa iyang katagbawan si Speaker Feliciano "Sonny" Belmonte sa nahimong resulta sa ilang imbestigasyon tungod kay napangutana tanan sa mga kongresista ang gusto nilang masayran.

Gi butyag pa ni Belmonte nga human natapos ang pakisusi, matutukan na karon sa mga magbabalaod ang pagtuki sa  Bangsamoro Basic Law  nga nakatakdang subling dunggon karong Abril 20 hangtud sa katapusan sa bulan. (etf/PIA News Digest)