Kapin 15 mil nakabenepisyo sa 13th ARENA XI Serbisyo CARAVAN

Compostela Valley Province – Miabot gyod sa kapin 15 mil ka mga individual ang nahatagan sa libreng mga serbisyo nga gibubo sa Gobyerno diha sa 12 ka mga barangay sa Maco ug Maragusan atol sa duha ka adlawng 13^th ARENA XI Serbisyo Caravan nga gitabangan pagtunol sa National Government Agencies nga nag-operate sa Davao Region ug sa kagamhanang lokal sa Comval Province sa pagpanguna nila ni Gov. Arturo “Chiongkee” Uy, Vice Gov. Manuel “Way Kurat” Zamora, Senior Board Member Tyron Uy, ug SP Members.

Gisulti ni PGSO Chief Arceli Timogtimog nga miabot gyod sa kapin 15 mil ka mga individual ang nakabenepisyo  sa lain-laing klase sa mga serbisyo nga gitunol nga libre sa mga katawhan sulod lang duha ka adlawng 13^th ARENA XI Serbisyo CARAVAN diha sa Brgy. New Leyte, Maco niadtong Abril 9-10,2015.

Matud pa niya nga sa unang adlaw adunay kapin 4,000 nga naserbisyohan ug mas daghan sa ikaduhang  adlaw nga miabot gyod sa kapin 11,000 nga nahatagan sa libreng serbisyo sa panglawas; sa libreng Enrollment sa PHILHEALTH; sa libreng Family Food Packs, ug sa gipanghatag nga libreng Durian Seedlings, Cacao Seedlings, Coffee Seedlings, Falcata Seedlings, Corn Seeds, Vegtable Seeds, ug uban pa.

Sa probinsiya lang adunay 1,379 pasyente naserbisyohan sa libreng medical, 176 sa libreng tuli, 23 sa libreng opera, 541 sa libreng ibot og ngipon, 108 sa libreng Ultrasound, ug 415 sa libreng Eye Check-up.

Sa Veterinary Services adunay 288 nahatagan sa libreng Deworming Tablets, 142 sa libreng Vitamin Supplementation, 14 sa libreng disease treatment, ug 8 sa libreng bakuna kontra rabies sa ilang mga iro.

Ang BFAR ug Fishery Division nanghatag og 43,000 Telapia Fingerlings. Samtang ang D.A. ug PAGRO nanghatag og 4,070 Cacao Seedlings, 3,000 Coffee Seedlings, 1,500 Durian Seedlings, libreng Corn Seeds, libreng Casava Stalks, ug libreng Vegetable Seeds.

Wa pay labot niini ang lain-laing serbisyo nga gihatag sa mga Regional Offices sa DSWD, DENR, DOST, AFP, PNP, PRC, NCIP, NEDA, DepEd, COMELEC, NFA, DTI, DOLE, PHIC, PAO, DAR, PRC, OPAPP, FIDA, NFA, ug uban pa. (Gilbert Cabahug/IDS Comval)